თურქეთში ვიზიტით მყოფი საქართველოს ეკონომიკისა და მდგრადი განვითარების მინისტრი გიორგი ქობულია თურქეთის სოფლის მეურნეობისა და მეტყეობის მინისტრს, ბექირ პაკდემირლის შეხვდა.

ეკონომიკის სამინისტროს პრესსამსახურის ცნობით, შეხვედრაზე საუბარი საქართველოსა და თურქეთს შორის სოფლის მეურნეობის დარგში თანამშრომლობის გაღრმავებასა და გაფართოებას შეეხო. კერძოდ, მინისტრებმა საქართველოდან თურქეთში ხორცის ექსპორტის ზრდა განიხილეს.

გიორგი ქობულიას განცხადებით, თურქეთის სოფლის მეურნეობის მინისტრმა სპეციალურ სამსახურს უკვე დაავალა, რომ საქართველოში გამოიგზავნოს კომისია, რომელიც წამყვანი ადგილობრივი ხორცკომბინატების ფიტოსანიტარულ ნორმებს შეისწავლის.

„ვვარაუდობთ და დიდი იმედი გვაქვს, რომ სერტიფიცირებას მივიღებთ და თურქეთში ხორცის ექსპორტის საგრძნობლად გაზრდა შეგვეძლება. ამასთან, თურქეთის სოფლის მეურნეობის მინისტრთან ვილაპარაკეთ თაფლის ექსპორტზე. აგრეთვე ინვესტორების მოზიდვაზე სოფლის მეურნეობის ისეთ დარგებში, როგორიცაა თხილის წარმოება. ვიმედოვნებთ, რომ თურქეთთან სოფლის მეურნეობის დარგში საკმაოდ სწრაფად გავაღრმავებთ ურთიერთობებს“, - აღნიშნა გიორგი ქობულიამ.

საქართველოს ეკონომიკისა და მდგრადი განვითარების მინისტრი გიორგი ქობულია სტამბოლის ახალი საერთაშორისო აეროპორტის გახსნის ცერემონიას დაესწრო. ცერემონიაში მსოფლიოს სხვადასხვა ქვეყნის მთავრობის მეთაურები და მაღალი რანგის პირები მონაწილეობდნენ. ღონისძიების მონაწილეებს თურქეთის რესპუბლიკის პრეზიდენტმა, რეჯეფ თაიფ ერდოღანმა სიტყვით მიმართა.