ეკონომიკისა და მდგრადი განვითარების მინისტრის მოადგილემ ნათია თურნავამ სამუშაო ჯგუფის მონაწილეებს, რომლებმაც ენერგოეფექტურობის შესახებ კანონპროექტი და ენერგოეფექტურობის სტრატეგია განიხილეს, მისასალმებელი მოხსენებით მიმართა. აღნიშნული პროექტი, რომელიც ევროპელ კონსულტანტებთან ერთად მომზადდა, საქართველოს პარლამენტში განსახილველად მიმდინარე წლის ბოლომდე უნდა წარედგინოს.

ეკონომიკისა და მდგრადი განვითარების სამინისტროს პრესსამსახურის ცნობით, ნათია თურნავამ განაცხადა, რომ აღნიშნული პროექტის განხორციელების შედეგად საქართვლოს ენერგეტიკის განვითარებაზე შესაძლოა მნიშვნელოვანი გავლენა მოახდინოს. მისი თქმით, ინდუსტრიასა თუ საყოფაცხოვრებო მეურნეობაში ენერგოეფექტურობის პროგრამის განხორციელებით წარმოქმნილი დანაზოგი საქართველოში ენერგომოხმარებას გაცილებით ეფექტურს გახდის.

„ჩვენ ვფიქრობთ ენერგეტიკის განვითარების ზოგად სტრატეგიაში ენერგოეფექტურობის ასახვა ენერგეტიკის პერსპექტივებს უკეთესობისკენ მნიშვნელოვნად შეცვლის,“ - განაცხადა ნათია თურნავამ.

კანონპროექტი ენერგოეფექტურობის შესახებ და თანმდევი ნორმატიული აქტები ევროპის რეკონსტრუქციისა და განვითარების ბანკის ტექნიკური თანამშრომლობის პროექტის ფარგლებში მომზადდა. ეს საშუალებას მისცემს საქართველოს განახორციელოს ენერგოეფექტურობის ეროვნული სამოქმედო გეგმით განსაზღვრული ღონისძიებები, შეასრულოს ევროკავშირთან ასოცირების შეთანხმებით და ენერგეტიკულ თანამეგობრობაში გაწევრიანებით აღებული ვალდებულებები.

სამუშაო შეხვედრა ეკონომიკისა და მდგრადი განვითარების სამინისტროში ევროპის რეკონსტრუქციისა და განვითარების ბანკის ტექნიკური თანამშრომლობის პროექტის „საქართველოს მთავრობის მხარდაჭერა ენერგოეფექტურობის შესახებ კანონის შემუშავებაში“ ფარგლებში გაიმართა.