საქართველოს პრემიერ-მინისტრის, მამუკა ბახტაძის განცხადებით, საქართველო 162 ქვეყანას შორის ,,მსოფლიო ეკონომიკური თავისუფლების“ რეიტინგში მე-7 ადგილზეა.

ამის შესახებ პრემიერ-მინისტრმა დღეს, მთავრობის სხდომის დაწყების წინ გამართულ ბრიფინგზე განაცხადა.


როგორც პრემიერ-მინისტრმა აღნიშნა, ფრეიზერის ინსტიტუტის რეიტინგის მაჩვენებელი იმ რეფორმების შედეგია, რომლებიც დღეს ქვეყანაში მიმდინარეობს.

„მოგეხსენებათ, ფრეიზერის ინსტიტუტი ყოველწლიურად აქვეყნებს შემაჯამებელ რეიტინგს ,,მსოფლიო ეკონომიკური თავისუფლების“ ინდექსით. წელს ამ რეიტინგში საქართველო მე-7 ადგილზეა 162 ქვეყანას შორის. მე-9 პოზიციიდან საქართველოს გადასვლა მე-7 პოზიციაზე არის იმ რეფორმების შედეგი, რომლებსაც დღეს ვატარებთ ქვეყანაში“, - განაცხადა მამუკა ბახტაძემ.

როგორც მთავრობის მეთაურმა აღნიშნა, საქართველოს ამგვარი პოზიციონირება ძალიან მნიშვნელოვანია, რადგან აღნიშნული რეიტინგი მიუთითებს იმაზე, რომ საქართველო არა მარტო სტაბილურად ინარჩუნებს მსოფლიო მასშტაბით ეკონომიკურად ყველაზე თავისუფალ ქვეყნებს შორის პოზიციას, არამედ ყოველწლიურად აუმჯობესებს შედეგებს.

„ეს არის მნიშვნელოვანი გზავნილი უცხოური ინვესტიციების მოზიდვის თვალსაზრისით“, - განაცხადა მამუკა ბახტაძემ.