საქართველოში ევროპის რეკონსტრუქციისაა და განვითარების ბანკის (EBRD) დირექტორთა საბჭოს საკონსულტაციო ვიზიტი დაიწყო.

ვიზიტის ფარგლებში, მაღალი რანგის სტუმრები ფინანსთა მინისტრს, ივანე მაჭავარიანს შეხვდნენ, რომელიც ევროპის რეკონსტრუქციისა და განვითარების ბანკში საქართველოს მხრიდან მმართველია. შეხვედრას, ასევე, ევროპის რეკონსტრუქციისა და განვითარების ბანკის რეგიონული დირექტორი, ბრუნო ბალვანერა დაესწრო.

ფინანსთა სამინისტროს პრესსამსახურის ცნობით, როგორც შეხვედრაზე აღინიშნა, ევროპის რეკონსტრუქციისა და განვითარების ბანკის მმართველი დირექტორების პირველი ვიზიტი საქართველოში, ბანკის მხრიდან ქვეყნის ინსტიტუციური განვითარების მხარდაჭერის კიდევ ერთი დადასტურებაა.

ვიზიტის მიზანია, საქართველოში EBRD-ის დაფინანსებით განხორციელებული, ასევე, სამომავლო პროექტებისა და ქვეყანაში ამჟამად მიმდინარე რეფორმების გაცნობა ისეთ სფეროებში როგორიცაა: კერძო ინვესტიციების წახალისება, ენერგოსექტორის მოდერნიზაცია, მუნიციპალური ინფრასტრუქტურის განვითარება, მყარი ნარჩენების მართვა, საქართველოს რეგიონული და გლობალური ინტეგრაციის ხელშეწყობა.

შეხვედრაზე ფინანსთა მინისტრმა იმ მხარდაჭერის მნიშვნელობაზე ისაუბრა, რომელსაც ევროპის რეკონსტრუქციისა და განვითარების ბანკი საქართველოს, როგორც ფინანსური თანამშრომლობის, ისე ევროპასთან ურთიერთობის გაღრმავებისა და ინვესტიციების მოზიდვის მიმართულებით უწევს.

მან იმედი გამოთქვა, რომ ბანკის ახალი სტრატეგიით განსაზღვრული მიმართულებები ხელს შეუწყობს ქვეყანაში კერძო სექტორის კონკურენტუნარიანობის გაზრდას, კაპიტალის ბაზრის განვითარებას, ფინანსებზე ხელმისაწვდომობის უზრუნველყოფას, ენერგოეფექტური პოლიტიკის მხარდაჭერას და სხვა.

საქართველო ევროპის რეკონსტრუქციისა და განვითარების ბანკში 1992 წელს გაწევრიანდა. ამ პერიოდიდან ბანკის ინვესტიციებმა საქართველოს ეკონომიკაში, დაახლოებით, 3.0 მილიარდი ევრო შეადგინა.