სასტუმრო “რუმსში“ საქართველოს ეკონომიკისა და მდგრადი განვითარების სამინისტროს სააგენტოს „აწარმოე საქართველოში“, PricewaterhouseCoopers (PwC) თანამშრომლობით, ბრიტანეთის საელჩოს კარგი მმართველობის ფონდის დაფინანსებით, მიმდინარე წლის 27 ივნისს საპილოტე პროექტის „ბიზნეს კავშირები მცირე და საშუალო ბიზნესისთვის“ დასკვნითი ღონისძიება გაიმართება.

ღონისძიების ფორმატი განსაზღვრულია B2B შეხვედრებით, სადაც ადგილობრივი მეწარმეები შეძლებენ დაუკავშირდნენ საქართველოში არსებულ მულტინაციონალურ და ე.წ. „ფრენჩაიზინგის“ კომპანიებს ადგილობრივი პროდუქციისა და მომსახურების შეთავაზების მიზნით.

ეკონომიკისა და მდგრადი განვითარების სამინისტროს პრესსამსახურის ინფორმაციით, პროექტის ფარგლებში შეირჩა სასტუმროსა და რესტორნების ე.წ. HoReCa-ს სექტორი, რომლის ფარგლებშიც მოღვაწე მულტინაცინალურ ბრენდებთან დასაკავშირებლად და პოტენციალის შესასწავლად, კვლევის შედეგად იდენტიფიცირებულმა მცირე და საშუალო ბიზნესის წარმომადგენლებმა შეავსეს შესაბამისი კითხვარი, რის მიხედვითაც მათთვის პროექტის ფარგლებში დაიგეგმა ჯგუფური და ინდივიდუალური ტრეინინგ პროგრამები.

ტრენინგ პროგრამები გაიმართა ისეთ მოდულებში როგორიცაა: სტრატეგია და დაგეგმვა, ლიდერობა და მენეჯმენტი, მომხმარებელზე ორიენტირებულობა, ხარისხი და ოპერაციები, მარკეტინგი, გაყიდვები მულტინაციონალურ კომპანიებთან, ფინანსები და ადამიანური რესურსების მართვა.
დასკვნითი ღონისძიების ფარგლებში, მცირე და საშუალო ბიზნესის წარმომადგენლებს ასევე საშუალება ექნებათ განათავსონ ნიმუშები მათთვის სპეციალურად გამოყოფილ სივრცეში (შოურუმში).
ღონისძიებაში მონაწილეობას მიიღებს საქართველოში არსებული 11 მულტინაციონალური და ე.წ. „ფრენჩაიზინგის“ კომპანია, მათ შორის სასტუმროები „Holiday Inn” და “Pullman”, რესტორანი “Hard Rock Café” და სხვა.