კატარში „ურთიერთგაგების მემორანდუმი საქართველოს მთავრობასა და კატარის სახელმწიფოს მთავრობას შორის ტურიზმის სფეროში თანამშრომლობის შესახებ“ გაფორმდა.
საქართველოს საგანგებო და სრულუფლებიანი ელჩის ნიკოლოზ რევაზიშვილის თანდასწრებით, კატარის მხრიდან მემორანდუმს ხელი მოაწერა ტურიზმის სააგენტოს დირექტორის მოვალეობის შემსრულებელმა ჰასან ალ-იბრაჰიმმა.



მემორანდუმი ორი ქვეყნის ტურისტულ სექტორებს შორის აქტიურ თანამშრომლობას ითვალისწინებს, რაც გულისხმობს ტურ ოპერატორებსა და ტურისტულ სააგენტოებს შორის თანამშრომლობის ხელშეწყობას, კერძო სექტორის წახალისებას ტურიზმის სფეროში ინვესტიციების განხორციელების კუთხით და სხვადასხვა ერთობლივი ტურისტული პროექტების მხარდაჭერას.



საქართველო, როგორც ტურისტული მიმართულება, კატარში განსაკუთრებული პოპულარობით სარგებლობს. ამას ხელს უწობს უვიზო რეჟიმი და ყოველდღიური პირდაპირი ფრენები დოჰა-თბილისის მიმართულებით. გასული 5 წლის განმავლობაში კატარიდან ვიზიტორების რაოდენობა საშუალოდ ყოველწლიურად ორმაგდება.



აღსანიშნავია, რომ საქართველოს მხრიდან აღნიშნული მემორანდუმი ხელმოწერილია ტურიზმის ეროვნული ადმინისტრაციის ხელმძღვანელის, გიორგი ჩოგოვაძის მიერ.



დოკუმენტი ხელს შეუწყობს ორ ქვეყანას შორის ტურიზმის სფეროში თანამშრომლობის კიდევ უფრო გაღრმავებას.