სასტუმრო მარიოტში დღეს ევროკავშირი ღონისძიებას უმასპინძლებს და თავის ახალ საგარეო ინვესტირების გეგმას წარადგენს.

ღონისძიებას, საქართველოს ვიცე–პრემიერი და ეკონომიკისა და მდგარდი განვითარების მინისტრი დიმიტრი ქუმსიშვილი, ევროკომისიის სამეზობლოსა და გაფართოების შესახებ მოლაპარაკებების დირექტორატის გენერალური დირექტორის მოადგილე კატარინა მატერნოვა და ევროპის რეკონსტრუქციისა და განვითარების ბანკის დირექტორი კავკასიაში, მოლდოვასა და ბელარუსში ბრუნო ბალვანერა გახსნიან.

ღონისძიებაზე საუბარი იქნება იმაზე, თუ რა სარგებელს მიიღებს საქართველო ევროკავშირის ინიციატივიდან, რომელიც ითვალისწინებს მომდევნო 4 წლის განმავლობაში 4.1 მილიარდი ევროს (12 მილიარდი ლარი) გამოყოფას. ამ ინიციატივის მიზანია სახელმწიფო და კერძო სტრუქტურების სტიმულირება, რათა მათ მოახდინონ ინვესტირება ევროკავშირის სიახლოვეს მდებარე ქვეყნებში, აღმოსავლეთ პარტნიორობის ქვეყნების ჩათვლით.

მონაწილეები ექსპერტებთან ერთად განიხილავენ ინვესტირების შესაძლებლობებსა და გამოწვევებს შემდეგ სფეროებში: მდგრადი განვითარება და ურთიერთკავშირები, მიკრო, მცირე და საშუალო ბიზნესი, სოფლის მეურნეობა, მდგრადი ქალაქები და ციფრული ტექნოლოგიები.