ეკონომიკისა და მდგრადი განვითარების მინისტრის მოადგილის, რომეო მიქაუტაძის განცხადებით, მესტიაჭალას ჰესი უსაფრთხოა მოსახლეობისთვის, მინიმალურია გარემოზე ზემოქმედება და აუცილებელია აღნიშნული სიმძლავრეების ინტეგრირება არსებულ სისტემაში.

ამის შესახებ მიქაუტაძემ მესტიაში, მოსახლეობის იმ ნაწილთან შეხვედრის შემდეგ, განაცხადა რომლებიც მესტიაჭალა ჰესის მშენებლობას ეწინააღმდეგებიან.
მისი თქმით, ადგილობრივებთან მოხდა შეთანხმება, რომ მომდევნო შეხვედრა 24 მარტს თბილისში ჩატარდება, რომელშიც ასევე მონაწილეობას მიიღებენ ექსპერტული წრეების წარმომადგენლებიც.


მსგავსი შეხვედრა ეკონომიკისა და მდგრადი განვითარების მინისტრის მოადგილემ მოსახლეობასთან მესამედ გამართა. რომეო მიქაუტაძემ შეხვედრის მონაწილეებს დეტალურად გააცნო მესტიაჭალის ჰესის პროექტი და მისი გავლენა როგორც გარემოზე, ისე მოსახლეობაზე. აღინიშნა, რომ მესტიაჭალა ჰესი 1-ისა და მესტიაჭალა ჰესი 2-ის დადგმული სიმძლავრე 50 მგვტ-ია, ხოლო პროექტების საინვესტიციო მოცულობა 75 მლნ აშშ დოლარია. ითქვა, რომ მშენებლობა მიმდინარეობს დარგში არსებული თანამედროვე ტექნიკური მიღწევების სრული გამოყენებით, კაშხლის მოწყობისა და მდინარის დაგუბების გარეშე, სადაწნეო მილსადენის პრინციპით, რაც გამორიცხავს პროექტის მნიშვნელოვან ზეგავლენას გარემო პირობებზე.


რომეო მიქაუტაძემ ყურადღება გაამახვილა პროექტების სოციალურ მხარეზეც. კერძოდ, ელექტროსადგურების მშენებლობის შედეგად ადგილობრივი მოსახლეობა დასაქმდება, ხოლო ადგილობრივ ბიუჯეტში მნიშვნელოვანი შემოსავალი შევა, რაც მესტიის და მიმდებარე სოფლების კეთილდღეობას მოხმარდება