საქართველოში და მსოფლიოში საწვავის გაძვირებას ნავთობპროდუქტების იმპორტიორთა კავშირის ხელმძღვანელი ვანო მთვრალაშვილი ირანის გარშემო შექმნილ ვითარებას უკავშირებს.
როგორც მან საინფორმაციო სააგენტო "ნიუსპრესთან" საუბრისას განაცხადა, საქართველო როგორც ნავთობპროდუქტების იმპორტიორი და მომხმარებელი ქვეყანა, პირდაპირ და ცალსახად არის დამოკიდებული ნავთობპროდუქტების საერთაშორისო ფასებზე.
"შესაბამისად მსოფლიოში არსებულმა გაძვირების ტენდენციამ განაპირობა ჩვენთანაც საწვავის ფასების მატება", - განაცხადა მთვრალაშვილმა.
მისი განმარტებით, ნავთობპროდუქტების საერთაშორისო ფასი PLATT ს-ის მიხედვით რეკორდულად მაღალ მაჩვენებელზე დგას - 24 თებერვლის მდგომარეობით, ბენზინის საერთაშორისო ფასი შეადგენს 1 101,50 აშშ დოლარს/ტონაზე, ხოლო დიზელის – 1027,25 აშშ დოლარს/ტონაზე. წლის დასაწყისიდან ბენზინის საერთაშორისო ფასი გაზრდილია ტონაზე საშუალოდ 150 აშშ დოლარით.
საქართველოში საწვავზე ფასმა ბოლო ერთი თვის განმავლობაში ორჯერ მოიმატა. ბენზინგასამართ სადგურებზე დღეს ყველა კატეგორიის საწვავი 5 თეთრით გაძვირდა.