ეკონომიკის მინისტრის დიმიტრი ქუმსიშვილის განცხადებით, მისი უწყების მთავარი ამოცანაა, ახალგაზრდების მაქსიმალურად წახალისება, რომ მათ შექმნან და განავითარონ საკუთარი ბიზნესი, დაასაქმონ საკუთარი თავი და შემდგომში სხვები.
ამის შესახებ პირველმა ვიცე-პრემიერმა საქართველოს პარლამენტის რიგგარეშე სესიაზე დასმული კითხვის საპასუხოდ განაცხადა, რომელიც ახალგაზრდების ქვეყნის ეკონომიკის განვითარებაში ჩართულობას ეხებოდა.


„ამ მიმართულებით ძალიან აქტიურები ვართ და გავაგრძელებთ პროცესს. ჩვენ მიზნად გვაქვს დასახული რეგიონებში ინოვაციური ცენტრების გახსნა, ამავე დროს, პროფესიული განათლების განვითარების კვალდაკვალ, რეგიონებში სამუშაო ადგილების შექმნა. ვითანამშრომლებთ ყველა ინიციატორთან ახალგაზრდების დასაქმების მიმართულებით. ძალიან მნიშვნელოვანია ჩვენთვის ინოვაციური ეკოსისტემის განვითარების სტარტაპების წახალისება და შესაბამისად, უნივერსიტეტებიდან და პროფესიული განათლებიდან იმ კადრების მიღება, რომლებიც ბაზარზეა მოთხოვნადი “ - აღნიშნა დიმიტრი ქუმსიშვილმა.