საერთაშორისო საფინანსო კორპორაციამ (IFC) სურსათის უვნებლობის ახალი სახელმძღვანელო შექმნა, რომელის პრეზენტაცია დღეს „თბილისი მარიოტში“ გაიმართა.
როგორც IFC-ს სურსათის უვნებლობის სპეციალისტმა ნათია მგელაძემ აღნიშნა, სახელმძღვანელო სურსათის მწარმოებელ კომპანიებს სურსათის უვნელობის პრაქტიკისა და მართვის სისტემების გაუმჯობესებაში დაეხმარება.
მისივე თქმით, სახელმძღვანელო სურსათის წარმოებაში მონაწილე ყველა რგოლს - კომპანიების მენეჯერებსა და სახელმწიფო ინსპექტორებს უვნებელი პროდუქტების წარმოების შესახებ კონკრეტული მითითებებით უზრუნველყოფს.
„სახელმძღვანელო პრაქტიკულ რჩევებს სთავაზობს საწარმოებს, კონსულტანტებს, მარეგულირებელ ორგანოებს, არასამთავრობო ორგანიზაციებს, მომხმარებელთა უფლებების დამცველებსა და მეცნიერებს. იგი კომპანიებს სისტემაში არსებულ ნაკლოვანებების გამოვლენასა და სურსათის უვნებლობის მართვის ეფექტიანი პრაქტიკის დანერგვაში დაეხმარება“ - განაცხადა მგელაძემ.
სამხრეთ კავკასიაში IFC-ს რეგიონული მენეჯერის, თომას ლიუბეკის განმარტებით, სურსათის უვნებლობის უზრუნველყოფა საერთო პასუხისმგებლობაა და ამ პროცესში ჩართული სხვადასხვა რგოლის ურთიერთთანამშრომლობას მოითხოვს.
„სურსათის უვნებლობის სახელმძღვანელო კომპანიებს არა მხოლოდ სურსათის უვნებლობის პრაქტიკის გაუმჯობესებაში დაეხმარება, არამედ ხელს შეუწყობს გაყიდვების ზრდას და ექსპორტის განვითარებასაც, რასაც თავის მხრივ, სამუშაო ადგილების შექმნა და ქვეყნის ეკონომიკის განვითარება მოყვება“-აღნიშნა ლიუბეკმა.
IFC-ს სურსათის უვნებლობის გაუმჯობესების პროექტი საქართველოში, რომლის ფარგლებშიც სახელმძღვანელო შეიქმნა, ავსტრიის ფინანსთა სამინისტროსა და BP-სა და მისი ნავთობისა და გაზის პარტნიორების ფინანსური მხარდაჭერით შეიქმნა.