მსოფლიო სავაჭრო ორგანიზაციის გენერალური დირექტორის მოადგილე ი ქსიოჟუნი, თბილისის აბრეშუმის გზის ფორუმის ფარგლებში თემატური პანელის „სავაჭრო ხელშეწყობა სარტყელი და გზის ინიციატივების ფარგლებში“ გამოვიდა სიტყვით.
როგორც ის აცხადებს, სარტყელისა და გზის ინიციატივის სრულად განხორციელების შემთხვევაში შესაძლებელი იქნება შეიქმნას მყისიერი კავშირები წარმოებასა და გასაღებას შორის, ასევე, ინკლუზიური ვაჭრობა და უფრო ძლიერი კავშირები აზიასა და ევროპას შორის.
ქსიოჟუნმა ისაუბრა მსოფლიო სავაჭრო ორგანიზაციის როლზე სავაჭრო ურთიერთობების განვითარების, ბარიერების მოხსნის და რეგიონალური და ორმხრივი თავისუფალი სავაჭრო შეთანხმებებით გათვალისწინებული ამოცანების მხარდაჭერის კუთხით. მისი განცხადებით, მსოფლიო სავაჭრო ორგანიზაციის შეთანხმებები ვაჭრობის ხელშეწყობის შესახებ, მიზნად ისახავს ექსპორტის, იმპორტის და სატრანზიტო პროცედურების ინტეგრირებას, გამარტივებას და სტანდარტიზაციას, რითაც შემცირდება ტვირთების მოძრაობის დრო, დანახარჯები საზღვრებზე, ასევე ბიზნესისთვის, განსაკუთრებით კი მცირე საწარმოებისთვის უფრო ადვილი გახდება ვაჭრობა და ღირებულებათა შექმნის გლობალურ ჯაჭვთან მიერთება. WTO-ს გენერალური დირექტორის მოადგილის ინფორმაციით, ხელშეკრულების სრული განხორციელებით შესაძლებელი იქნება, ვაჭრობის ხარჯების შემცირება საშუალოდ, 14,5%-ით.
„ახალი აბრეშუმის გზის გასწვრივ მდებარე ქვეყნები უდავოდ მიიღებენ სარგებელს მისი სრული და სწრაფი განხორციელების შედეგად.“ - განაცხადა ი ქსიოჟუნმა.
როგორც გამომსვლელმა აღნიშნა, ელექტრონული ვაჭრობა არის კიდევ ერთი მნიშვნელოვანი ფაქტორი, რომელიც მცირე და საშუალო ზომის საწარმოებისთვის ბიზნესის წარმოების ხარჯებს მნიშვნელოვნად შეამცირებს.