უკრაინის პრემიერ-მინისტრის ვოლოდიმერ გროისმანის განცხადებით, რეგიონში საქართველოს ლიდერობა საქართველო-უკრაინის ეკონომიკის ხელშემწყობი ფაქტორს წარმოადგენს.

ამის შესახებ გროისმანმა თბილისში მიმდინარე აბრეშუმის გზის ფორუმზე საქართველო-უკრაინის თანამშრომლობის მნიშვნელობაზე საუბრისას განაცხადა.

„ჩვენ გვიხარია საქართველოს წარმატება და დარწმუნებული ვარ, რეგიონში თქვენი ლიდერობა ხელს შეუწყობს ჩვენს ეკონომიკურ განვითარებას“ - განაცხადა უკრაინის პრემიერ მინისტრმა.

ვოლოდიმერ გროისმანმა თბილისის აბრეშუმის გზის ფორუმის მნიშვნელობაზეც ისაუბრა და აღნიშნა, რომ მისი მეორედ ჩატარება მნიშვნელოვანია და ხელს უწყობს ევროპასა და აზიას შორის კავშირების გაუმჯობესებას. უკრაინის პრემიერ მინისტრმა შავი ზღვის რეგიონში საბორნე გადაზიდვების ხელშეწყობაზე ისაუბრა: „ჩვენ ვგეგმავთ 60%-მდე შევამციროთ ტარიფები საბორნე გადაზიდვაზე. ჩვენი მიზანია, ეს სფერო კონკურენტუნარიანი გახდეს“- განაცხადა ვოლოდიმერ გროსიმანმა.

უკრაინის პრემიერ მინისტრმა ასევე აქცენტი გააკეტა აღმოსავლეთსა და დასავლეთს შორის დამაკავშირებელი დერეფნის განვითარების საკითხზე.
„აზიასა და ევროპას შორის, ასევე ბალტიის ქვეყნების მიმართულებით დამაკავშირებელი სერიოზული მიმართულებები არსებობს. ამ დერეფნების თვალსაზრისით, უკრაინას შეუძლია იყოს საკმაოდ სანდო პარტნიორი. რაც ბატონმა კვირიკაშვილმა ბრძანა, ზუსტად ამაზე მსურს თქმა, რომ ჩვენ შეგვიძლია შევქმნათ გაერთიანება: საქართველო-აზერბაიჯანი-უკრაინა, რკინიგზის და საბორნე მიმოსვლის გამოყენებით“- განაცხადა გროისმანმა.

ვოლოდიმერ გროისმანმა უკრაინის ეკონომიკის განვითარების და ევროკავშირთან თავისუფალი ვაჭრობის შესახებ დადებული შეთანხმების შესახებაც ისაუბრა, მან განსაკუთრებული აქცენტი ინფრასტრუქტურის და კომუნიკაციების განვითარებაზე გააკეთა.