პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა ბელარუსის პრემიერ-მინისტრის მოადგილესთან, მიხაილ რუსისთან გამართა შეხვედრა.

ეკონომიკის სამინისტროს პრესსამსახურის ინფორმაციით, შეხვედრის მთავარი თემა საქართველო-ბელარუსის ორმხრივი სავაჭრო-ეკონომიკური ურთიერთობები იყო.

შეხვედრა მთავრობის ადმინისტრაციაში გაიმართა და მასში ასევე მონაწილეობა მიიღეს სოფლის მეურნეობის მინისტრმა ლევან დავითაშვილმა, ეკონომიკისა და მდგრადიგანვითარების მინისტრის მოადგილემ გენადი არველაძემ და სხვა ოფიციალურმა პირებმა.

შეხვედრაზე პირველმა ვიცე-პრემიერმა დიმიტრი ქუმსიშვილმა ბელარუსელ კოლეგას მიაწოდა დეტალური ინფორმაცია საქართველოს ეკონომიკური მდგომარეობის, მთავრობის 4-პუნქტიანი გეგმისა და მის ფარგლებში მიმდინარე რეფორმების შესახებ. დიმიტრი ქუმსიშვილმა, რომელიც ამავე დროს არის საქართველო-ბელარუსის მთავრობათაშორისი ეკონომიკური თანამშრომლობის კომისიის თანათავმჯდომარე, ბელარუსელ კოლეგასთან განიხილა ორ ქვეყანას შორის სავაჭრო-ეკონომიკური თანამშრომლობის ძირითადი მიმართულებები, მათ შორის, ორმხრივი ვაჭრობის, ტურიზმის, ტრანსპორტისა და სოფლის მეურნეობის მიმართულებით.

შეხვედრაზე დადებითად შეფასდა საქართველოსა და ბელარუსის პრემიერ-მინისტრების გადაწყვეტილებით ჩამოყალიბებული სავაჭრო-ეკონომიკური ჯგუფის მუშაობა,რომელიც პოზიტიურ ეკონომიკურ მაჩვენებლებში უკვე აისახა. აღინიშნა, რომ 2017 წლის პირველ 9 თვეში სავაჭრო ბრუნვა ქვეყნებს შორის 24 პროცენტით, ექსპორტი კი - 50პროცენტით გაიზარდა. რაც შეეხება ტურიზმის მაჩვენებლებს, 2017 წლის პირველ 10 თვეში, საქართველოში, წინა წლის ანალოგიურ პერიოდთან შედარებით, 28 პროცენტითმეტი ტურისტი ჩამოვიდა.

შეხვედრაზე ასევე გამახვილდა ყურადღება ერთობლივ პროექტებზე, მათ შორის, საქართველოში ბელარუსული წარმოების ლიფტების შემოტანა-დამონტაჟების, პერსპექტივაშიკი მათი საქართველოში აწყობის შესახებ. გარდა ამისა, საუბარი წარიმართა სოფლის მეურნეობის სფეროში თანამშრომლობის გაღრმავებაზე.

სამუშაო ვიზიტის ფარგლებში, ბელარუსის პრემიერ-მინისტრის მოადგილე მიხაილ რუსი შეხვედრებს გამართავს საქართველოს ხელისუფლების სხვა ოფიციალურ წარმომადგენლებთან, აგრეთვე მონაწილეობას მიიღებს საქართველოში ბელარუსული კულტურის დღეების გახსნის საზეიმო ცერემონიალში.