პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარის რომან კაკულიას განცხადებით, ეროვნული ვალუტის გაუფასურებასთან დაკავშირებით განმარტებები საქართველოს ეროვნულმა ბანკმა უნდა გააკეთოს.
კაკულიას თქმით, ლარის მცურავი კურსი შესაძლოა იმ ტრანზაქციებთან იყოს კავშირში, რომელიც თავისი მასშტაბურობით მოქმედებს პატარა ბაზარზე.
ამის შესახებ კაკულიამ ლარის კურსის მკვერად გაუფასურებასთან დაკავშირებით საკითხის კომენტირებისას განაცხადა.
„როდესაც ასეთ ცვლილებებთან გვაქვს საქმე ეროვნულმა ბანკმა უნდა გააკეთოს განცხადება ყოველთვის, არა მხოლოდ იმიტომ რომ ეს ის სფეროა, რომელსაც ის კურირებს, არამედ იმიტომ რომ არსებობს ისეთი ტიპის ინფორმაციები, რომელთანაც მას აქვს წვდომა. თავისუფალი მცურავი კურსი მართლა ისეთი მოწყვლადი ეკონომიკისთვის, როგორიც საქართველოშია, უშვებს ასეთი ტიპის მოძრაობას, მაგრამ მაშინ ძალიან მალე დასტაბილურებას უნდა ჰქონდეს ადგილი, ან შეიძლება ჩვენ გვაქვს ისეთი ტიპის ტრანზაქციებთან საქმე, რომელიც აკრძალული კი არაა და რაიმე კანონდარღვევით კი არაა, არამედ თავისი მასშტაბურობით ზემოქმედებს ასეთ პატარა ბაზარზე“- განაცხადა კაკულიამ.
შეგახსენებთ, რომ ეროვნული ვალუტა დღეს მკვეთრად გაუფასურდა. დოლართან მიმართებით მისი ოფიციალური ღირებულება 2.6830 ლარია.