,,ეს გახლავთ პირველი კომისიის სხდომა, რომელიც 2002 წლის შემდეგ იმართება და განვიხილავთ ისეთ მნიშვნელოვან საკითხებს, როგორიცაა ენერგეტიკის, ტრანსპორტის, სოფლის მეურნეობის სფერო, ასევე ღრმა და ყოვლისმომცველი თავისუფალი ვაჭრობის სივრცის ფარგლებში თანამშრომლობა’’– ეს განცხადება ეკონომიკისა და მდგრადი განვითარების მინისტრის მოადგილემ გენადი არველაძემ საქართველო–რუმინეთის ეკონომიკური თანამშრომლობის კომისიის პირველი სხდომის დაწყებამდე გააკეთა.
სასტუმრო ,,ქორთიარდ მერიოტში“ გამართულ სხდომას თანათავმჯდომარეობას რუმინეთის ბიზნესგარემოს, კომერციისა და მეწარმეობის მინისტრი ჰარი ილან ლაუფერი და საქართველოს ეკონომიკისა და მდგრადი განვითარების მინისტრის მოადგილე გენადი არველაძე უწევდნენ.
მხარეებმა მიმოიხილეს ორმხრივი თანამშრომლობის კუთხით გადადგმული ნაბიჯები და განიხილეს თანამშრომლობის პერპექტივები ისეთ სფეროებში, როგორებიცაა ვაჭრობა და ინვესტიციები, ტრანსპორტი, ენერგეტიკა, სოფლის მეურნეობა, ინტელექტუალური საკუთრების დაცვა და სხვა.
კომისიის ფარგლებში მხარეებმა განსაკუთრებული ყურადღება დაუთმეს ტურიზმის სფეროში გამოცდილების გაზიარებას. რუმინეთის ბიზნესგარემოს, კომერციისა და მეწარმეობის მინისტრისგანცხადებით, აუცილებელია ორ ქვეყანას შორის პირდაპირი ავიამიმოსვლა დაიწყოს.
,,ჩვენ გამოვხატეთ დაინტერესება ჩინეთის აბრეშუმის გზის პროექტის სამომავლო განვითარებასა და მის განხორციელებაში თანამონაწილეობაზე. როგორც მოგეხსენებათ, „კონსტაცა“ არის რუმინული, ყველაზე დიდი და ღრმა პორტი შავი ზღვის აუზში. ვიცით, რომ თქვენ აპირებთ შავ ზღვაზე მეორე ყველაზე დიდი პორტის შექმნას, შესაბამისად, ჩვენთვის ეს არის ძალიან მკაფიო და მნიშვნელოვანი პრიორიტეტი’’– განაცხადა ჰარი ილან ლაუფერმა.
შეხვედრაზე მხარეებმა ხაზი გაუსვეს ასოცირების შესახებ შეთანხმების ფარგლებში, საქართველოს მიერ განხორციელებულ პროგრესს. რუმინეთის მხარემ აღნიშნულ პროცესში საქართველოს მხარდაჭერის სრული მზადყოფნა გამოთქვა.
შეხვედრის ბოლოს ხელი მოეწერა საქართველო–რუმინეთის ერთობლივი ეკონომიკური თანამშრომლობის კომისიის პირველი სხდომის ოქმს.