საქართველოს პრემიერ-მინისტრი გიორგი კვირიკაშვილი ინვესტიციების მიმართულებით მსხვილი ბრიტანული კომპანია "Schroders Investment Management"-ის მენეჯერებს შეხვდა.

პრემიერის პრესსამსახურის ინფორმაციით, როგორც დღეს გამართულ შეხვედრაზე აღინიშნა, ბრიტანული კომპანია კომპანია საქართველოში ინვესტიციის მოცულობის მნიშვნელოვნად გაზრდას გეგმავს.
საუბარი შეეხო საქართველოს მთავრობის ოთხპუნქტიანი რეფორმების გეგმას და სივრცითი მოწყობის მიმართულების ფარგლებში დაგეგმილ მსხვილ ინფრასტრუქტურულ პროექტებს, რომლებსაც არა მხოლოდ სახელმწიფოებრივი, არამედ რეგიონული მნიშვნელობა ენიჭება.
პრემიერმა აღნიშნა, რომ მხოლოდ მიმდინარე წელს, ინფრასტრუქტურული პროექტების მიმართულებით 36%-იანი ზრდა დაფიქსირდა, ხოლო 2018 წელს, 2016 წლის ბაზასთან შედარებით, პროექტების ჯამური მოცულობა 90%-ით გაიზრდება.
ყურადღება გამახვილდა ქვეყნის ეკონომიკის განვითარების პოზიტიურ დინამიკაზე, ექსპორტის ზრდის ტენდენციასა და პოტენციალზე, რომელსაც ინვესტორებს საქართველოს მიერ მეზობელ ქვეყნებთან, ევროკავშირსა და ჩინეთთან გაფორმებული თავისუფალი ვაჭრობის შეთანხმებები სთავაზობს.
პრემიერ-მინისტრი ინვესტორებს ესაუბრა დამწყები ბიზნესისა და მეწარმეობის განვითარების ხელშეწყობის პროგრამებზე, ასევე - საერთაშორისო რეიტინგებში საქართველოს მოწინავე პოზიციებზე.
შეხვედრაში "Global Emerging Markets investments"-ის ხელმძღვანელი როლო როსკოუ, - "Frontier Markets and Middle East investments"-ის ხელმძღვანელი რამი სიდანი, საქართველოს ეკონომიკისა და მდგრადი განვითარების მინისტრი გიორგი გახარია და რეგიონული განვითარებისა და ინფრასტრუქტურის მინისტრი ზურაბ ალავიძე მონაწილეობდნენ.
"Schroders Investment Management"-ს ამ დრომდე საქართველოში განხორციელებული აქვს 200 მილიონ აშშ დოლარამდე მოცულობის ინვესტიცია.