ქართული პროდუქცია 19-21 ოქტომბერს ბერლინში გამართულ გამოფენა-გაყიდვაზე სახელწოდებით „განსაკუთრებული საქართველო“ წარგება.
ღონისძიება საქართველოს ეკონომიკისა და მდგრადი განვითარების სამინისტროს სააგენტოს „აწარმოე საქართველოში“, გერმანიის ფედერაციული რესპუბლიკის საელჩოს, გერმანიის საგარეო საქმეთა სამინისტროს, ასოციაციის „ქართული ღვინო“, USAID/Reap-ის და ტურიზმის ეროვნული ადმინისტრაციის მხარდაჭერით გაიმართება.

ეკონომიკის სამინისტროს პრესსამსახურის ინფორმაციით, „განსაკუთრებული საქართველო - (Georgia Special)“, ბერლინის ისტორიული ბაზრის ტერიტორიაზე საქართველო-გერმანიის წლის ფარგლებში ჩატარდება, რომელიც ხელს შეუწყობს ქართული ტრადიციული სამზარეულოს, ღვინისა და ეროვნული ნაწარმის პოპულარიზაციას. გამოფენა-გაყიდვაზე წარმოდგენილი იქნება ბერლინში არსებული ქართული რესტორნებისა და ქართული ექსპორტიორი კომპანიების პროდუქცია.

გამოფენის პირველ დღეს დაგეგმილია ქართული კერძების დეგუსტაცია. უცხოელ ვიზიტორებს საშუალება მიეცემათ დააგემოვნონ ქართული ნაწარმი და გაეცნონ ქართული ტრადიციული სუფრის მრავალსახეობებს, ხინკალს, ხაჭაპურს, ფხალეულობას, ყველს, ასევე მოეწყობა ქართული ღვინის დეგუსტაცია, სადაც დაინტერესებული პირები გაეცნობიან ქართული ღვინის სახეობებს და ქვევრის ღვინის დაყენების ქართულ ტრადიციულ მეთოდს.