ფერმერთა ასოციაციამ (GFA), ევროკავშირის მხარდაჭერით, საქართველოს ფერმერთა სათათბირო ოფიციალურად დააფუძნა. სასტუმრო "ჰოლიდეი ინში" ასოციაციის სათათბიროს დაფუძნებისა და სათათბიროს შემადგენლობის პრეზენტაციას საქართველოში ევროკავშირის წარმომადგენლობის ხელმღვანელი იანოშ ჰერმანი, აშშ-ის საერთაშორისო განვითარების სააგენტოს UშAID-ის, შვეიცარიის განვითარების სააგენტოსა და სხვა პარტნიორი ორგანიზაციების წარმომადგენლები დაესწრნენ.
ეკონომიკის სამინისტროს პრესსამსახურის ინფორმაციით, 5 წლის განმავლობაში გაწეულ საქმიანობასა და სამომავლო გეგმებზე ფერმერთა ასოციაციის პრეზიდენტმა ნინო ზამბახიძემ ისაუბრა. ღონისძიების მონაწილეებს მისასალმებელი სიტყვით სოფლის მეურნეობის მინისტრმა ლევან დავითაშვილმა და ეკონომიკისა და მდგრადი განვითარების მინისტრმა გიორგი გახარიამ მიმართეს.
საქართველოს ეკონომიკისა და მდგრადი განვითარების მინისტრმა ფერმერთა ასოციაციას დაარსების 5 წლის იუბილე მიულოცა. მისი შეფასებით, ასოციაცია დღესდღეობით საქართველოში ერთ-ერთი ყველაზე ძლიერი და წარმატებული პროფესიული გაერთიანებაა, რომელსაც სოფლის მეურნეობის განვითარების პროცესში დიდი წვლილი შეაქვს.
"ალბათ დღეს ძალიან დიდი გადაწყვეტილება მივიღე, თუ რას გავაკეთებ ამ სამსახურიდან წასვლის შემდეგ - ერთმნიშვნელოვნად გავხდები ფერმერი და მინდა, იცოდეთ, რომ რასაც თქვენ დღეს აკეთებთ, სამაგალითოა. ეს საზოგადოების ორგანიზების მოდელია, თუ როგორ უნდა აიღოს ცალკეულმა ადამიანმა თავის თავზე პასუხისმგებლობა - სახელმწიფოს კი არ უნდა უყუროს და მისგან რაღაცას კი არ ელოდოს, არამედ, პასუხისმგებლობა თავად აიღოს. თქვენ ამ მაგალითს ყველას აძლევთ და ეს არის ყველაზე მთავარი - აღნიშნა გიორგი გახარიამ.
ეკონომიკისა და მდგრადი განვითარების მინისტრის განცხადებით, ყველა წამოწყებასა და ინიციატივას გარკვეული ფინანსური სტაბილურობა სჭირდება:
"ჩვენ შეგვიძლია უბრალოდ შევქმნათ გარკვეული ინფრასტრუქტურა, რომელიც საშუალებას მოგცემთ, იმოქმედოთ ისე, როგორც ახლა მოქმედებთ. ეს შეიძლება იყოს სპეციალური რეჟიმები, ,,აწარმოე საქართველოში" ფარგლებში და სოფლის მეურნეობის პროგრამების ფარგლებში თქვენი დახმარება შეიძლება თავისუფალი ვაჭრობის რეჟიმებიც იყოს, რათა ხარისხიანი პროდუქტი ექსპორტზე უფრო მარტივად გაიტანოთ"- განაცხადა გიორგი გახარიამ.
უწყების ცნობით, საქართველოს ფერმერთა ასოციაცია 2012 წელს ფერმერ ნინო ზამბახიძის ინიციატივითა და უშუალო ხელმძღვანელობით დაფუძნდა. ის ამჟამად 2000-მდე ფერმერს აერთიანებს. ასოციაციამ მოკლე დროში შეძლო სახელმწიფოსა და ფერმერთა შორის მაკოორდინირებელ ორგანიზაციად ჩამოყალიბება. ღონისძიების მიმდინარეობისას აქცენტი საქართველოს ფერმერთა სათათბიროს მიზნებსა და პრიორიტეტებზე გაკეთდა.