საქართველოს პირველი ვიცე-პრემიერი, ფინანსთა მინისტრი, საქართველოს მხრიდან აზიის განვითარების ბანკში მმართველი დიმიტრი ქუმსიშვილი აზიის განვითარების ბანკის აღმასრულებელ დირექტორს, მეთიუ ფოქსს შეხვდა.
შეხვედრაზე მხარეებმა საქართველოში აზიის განვითარების ბანკის მიმდინარე და სამომავლო პროექტები განიხილეს.
ფინანსთა სამინისტროს ცნობით, აღინიშნა, რომ აღნიშნული საფინანსო ორგანიზაცია ერთ-ერთი უმსხვილესი განვითარების პარტნიორია საქართველოსთვის, რომლის პორტფოლიო 2.1 მლრდ დოლარზე მეტია, მათ შორისაა, კერძო სექტორის მხარდაჭერა და ტექნიკური დახმარება.
დიმიტრი ქუმსიშვილმა აზიის განვითარების ბანკის აღმასრულებელ დირექტორს საქართველოში არსებული ეკონომიკური ვითარება გააცნო, ინფორმაცია მიაწოდა მთავრობის 4-პუნქტიანი რეფორმების გეგმისა და მიმდინარე და დაგეგმილი ეკონომიკური და სტრუქტურული რეფორმების შესახებ. ყურადღება გამახვილდა ბანკის საქმიანობის სტრატეგიაზე მომდევნო წლების განმავლობაში.
აღინიშნა ისიც, რომ აზიის განვითარების ბანკის მიერ მხარდაჭერილი პროექტები საქართველოში მიმდინარე რეფორმებთან სრულ თანხვედრაშია, რაც მათ ეფექტიანობას მნიშვნელოვნად ზრდის.
აზიის განვითარების ბანკის აღმასრულებელმა დირექტორმა ხაზი საქართველოსა და ბანკს შორის არსებული პარტნიორობის მნიშვნელობასაც გაუშვა. როგორც მეთიუ ფოქსმა აღნიშნა, ბანკი საქართველოს ისეთი პრიორიტეტული დარგების განვითარებას უწყობს ხელს როგორებიცაა: ტრანსპორტი, წყალმომარაგება, ენერგეტიკის სფერო.
"აზიის განვითარების ბანკსა და საქართველოს შორის თანამშრომლობა ძალიან მყარია, რომელსაც დამაიმედებელი სამომავლო პერსპექტივები გააჩნია," - განაცხადა აზიის განვითარების ბანკის აღმასრულებელმა დირექტორმა.