სომხურმა საინფორმაციო სააგენტო «Новости – Армения»-მ გამოაქვეყნა ცნობილი რუსი პოლიტოლოგის სერგეი მარკედონოვის კომენტარი სალომე ზურაბიშვილის ერევანში ვიზიტის თაობაზე, რომელსაც საინფორმაციო სააგენტო „ნიუსპრესი“ გთავაზობთ:

„სალომე ზურაბიშვილი დღეს საქართველოს საგარეო საქმეთა „სუპერმინისტრად“ იქცა. ცხადია, მისი სახელისუფლებო უფლებამოსილებები შეკვეცილია, მაგრამ სამაგიეროდ აქვს ფართო საერთაშორისო კავშირები, რომლებსაც თავისი ქვეყნის სასარგებლოდ იყენებს. ამავე დროს ერევანში ვიზიტის კონტექსტში ერთი საკმაოდ საინტერესო დეტალი არსებობს: როგორც ცნობილია, სალომე ზურაბიშვილმა ბაქოში ყოფნისას განაცხადა, რომ საქართველოს და აზერბაიჯანს არა მხოლოდ გეოგრაფია აერთიანებთ, არამედ ერთი ბედი სახელმწიფოს მშენებლობაშიც და ხაზი გაუსვა, რომ ორივე ქვეყანას ტერიტორიული მთლიანობა აქვს დარღვეული. თითქოს რიტორიკული საკითხია, მაგრამ გასაგებია, თუ ვის ადანაშაულებენ თავისი ქვეყნის ტერიტორიული მთლიანობის დარღვევაში აზერბაიჯანელი პოლიტიკოსები. ერევანში ყოფნისას სალომე ზურაბიშვილმა მოინახულა მემორიალი, რომელიც ოსმალეთის იმპერიის მიერ სომხების მიმართ ჩადენილ გენოციდს ასახავს და რომელსაც თანამედროვე აზერბაიჯანში უარყოფენ. პირიქით, ბაქო აცხადებს, რომ გასულ საუკუნეში სომხების მიერ გენოციდი სწორედ აზერბაიჯანელების წინააღმდეგ განხორციელდაო.

ისტორიკოსმა სერგეი სოლოვიოვმა გეოგრაფიას მეტაფორულად უწოდა „რუსეთის დედინაცვალი“, რაც სამხრეთ კავკასიის ყველა სახელმწიფოსაც ესადაგება, განსაკუთრებით საქართველოს, რომელსაც საერთო საზღვრები აქვს როგორც სომხეთთან, ისე აზერბაიჯანთან. თბილისი იძულებულია მათ შორის აკურატული ლავირება მოახდინოს. სასწორის ერთ მხარეს არის ეკონომიკური კავშირები, ბაქოს მიერ ქართულ ეკონომიკაში ჩადებული ინვესტიციები, სატრანსპორტო და ლოჯისტიკური პროექტები, მეორე მხარეს კი - კეთილმეზობლობა იმ სახელმწიფოსთან, რომელიც ევრაზიული ეკონომიკური კავშირისა და კოლექტიური უსაფრთხოების ხელშეკრულების ორგანიზაციის („ოდკბ“) წევრია, ანუ რეგიონში რუსეთის უახლოეს მოკავშირეს წარმოადგენს“, - ამბობს სერგეი მარკედონოვი.

რუსმა პოლიტოლოგმა აღნიშნა ეთნიკური ფაქტორიც - საქართველოში ხომ ბევრი სომეხი და აზერბაიჯანელი ცხოვრობს: „ასეთ სიტუაციაში ყოველ მოუქნელ მოძრაობას ქვეყნის შიგნით არასტაბილურობის პროვოცირება შეუძლია... ყველა ჩამოთვლილი ფაქტორი ნიშნავს იმას, რომ საქართველომ ერთმანეთის მიმართ მტრულად განწყობილ მეზობლებს შორის ერთგვარი ბალანსი უნდა დაიცვას“.