ქართული პოლიტიკის „რუხი კარდინალი“, მილიარდერი ბიძინა ივანიშვილი ამ კვირაში
გადაწყვიტა ფართო კომენტარებით გამოსულიყო ქვეყანაში შექმნილ სიტუაციასთან დაკავშირებით. მან საქართველოს საზოგადოებრივ ტელევიზიას ვრცელი ინტერვიუ მისცა და შეეცადა პასუხი გაეცა აქტუალურ საკითხებზე, პირველ რიგში კი საშინაო პოლიტიკის ირგვლივ. ბიძინა ივანიშვილის თანამებრძოლებმა „ქართული ოცნებიდან“ ინტერვიუ დადებითად შეაფასეს - „გულწრფელად ილაპარაკაო“. პრინციპში, ისინი მართლები არიან. პოლიტიკაში ახლახან დაბრუნებულმა მილიარდერმა აღიარა, რომ საქართველო კვლავ ღარიბ ქვეყნად რჩება, თუმცა არც თავისი მთავარი მიზანი არ დაუმალავს: „რკინის ხელით“ აღკვეთოს მმართველ გუნდში დაწყებული უთანხმოება იმ დროს, როცა საპრეზიდენტო არჩევნებამდე ორიოდე თვე რჩება, ხოლო საპარლამენტომდე - ორი წელი.
ბიძინა ივანიშვილმა სერიოზული წარუმატებლობის ფონზე გადაწყვიტა, რომ „განტევების ვაცად“ მინისტრთა კაბინეტის ყოფილი მეთაური გიორგი კვირიკაშვილი ექცია. თავის ინტერვიუში „ქართული ოცნების“ ლიდერმა განაცხადა, რომ პრემიერ-მინისტრი ქვეყანას ვერ ხელმძღვანელობდაო და მას საპარლამენტო საქმეებშიც ჩარევაც კი დააბრალა.
ბიძინა ივანიშვილის აღიარება იმაში, რომ გიორგი კვირიკაშვილის პრემიერობის პერიოდში მმართველმა გუნდმა დაშლა დაიწყოო, მართლაც საყურადღებოა, მაგრამ ერთი საკითხი მაინც ღიად რჩება: თუ გიორგი კვირიკაშვილმა ვერ ივარგა, მაშ რატომ დატოვა ამდენ ხანს ბიძინა ივანიშვილმა და „ქართულმა ოცნებამ“ იგი მთავრობის თავმჯდომარედ? და ახლა უუნარობასა და უნიჭობაში ადანაშაულებს... ეს ის კითხვაა, რომელსაც პასუხი არ ექნება. თუმცა ამით საქართველოს მთავარმა „თოჯინათმმართველმა“ მიმდინარე ამოცანა გადაწყვიტა და ყველა ცოდვა თანამდებობიდან გადამდგარ პრემიერ-მინისტრს აჰკიდა, ახლა კი თვითონ „სუფთა ფურცლით“ იწყებს. კაცმა რომ თქვას, მილიარდერს სხვა არჩევანი არც აქვს, რადგან გაქცეული ექს-პრეზიდენტი მიხეილ სააკაშვილი არ მალავს თავის განზრახვას ისარგებლოს შემოდგომაზე დაგეგმილი არჩევნებით, ქვეყანაში სიტუაცია აურიოს და მორიგი რევოლუცია მოაწყოს.
საპრეზიდენტო არჩევნებთან დაკავშირებით ოლიგარქმა გადაწყვიტა ინტრიგული სიტუაცია შეენარჩუნებინა: არაა გამორიცხული მმართველმა პარტიამ მხარი ოპოზიციის კანდიდატს ან დამოუკიდებელ პიროვნებას დაუჭიროსო. ზოგიერთმა ექსპერტმა იფიქრა, რომ მილიარდერს მხედველობაში პრემიერის სპეცწარმომადგენელი ზურაბ აბაშიძე ჰყავდა მხედველობაში, რომელიც თითქოსდა ნეიტრალურ პიროვნებადაა მიჩნეული. თუმცა ბიძინა ივანიშვილმა კანდიდატის რანგში არც საკუთარი თავი არ გამორიცხა საბოლოოდ - აშკარაა, იმ შემთხვევისათვის, თუ მიხეილ სააკაშვილის გარემოცვა სიტუაციას სერიოზულად აურ-დაურევს.
არადა, დღევანდელი და გუშინდელი „მიშისტები“საპრეზიდენტო არჩევნებისათვის აქტიურად ემზადებიან: გუშინდელებმა, ანუ „ევროპულმა საქართველომ“ კანდიდატად დავით ბაქრაძე წამოაყენა, ხოლო დღევანდელმა - გრიგოლ ვაშაძე. „ევროპელი“ დავით ბაქრაძე პოზიტიურად გამოეხმაურა თავისი ყოფილი შეფის მიხეილ სააკაშვილის მოწოდებას ძალთა გაერთიანების თაობაზე, მაგრამ ეს უფრო იმ შემთხვევაში შეიძლება მოხდეს, თუ მეორე ტური გაიმართება, რაც ნაკლებად მოსალოდნელია.
ბიძინა ივანიშვილმა, სხვათა შორის, ინტერვიუში დაიჩივლა, რომ ოპოზიცია ძალიან აგრესიულ და უარგუმენტო განცხადებებს აკეთებსო. ალბათ, უახლოეს ხანში „ნაციონალური მოძრაობის“ ორივე გუნდის ანტისამთავრობო განცხადებები კიდევ უფრო გამძაფრდება და კონფრონტაციული გახდება. მილიარდერი ამას ითვალისწინებს და ამიტომ მკაცრი გამოთქმებით საკუთარი გუნდის „შეჯანჯღარება“ და მობილიზება გადაწყვიტა. მაგრამ განა ასეთი მეთოდით სწრაფად მოგვარდება სოციალურ-ეკონომიკური პრობლემები? მხოლოდ დაპირება-განცხადებები საკმარისი არ არის. მეორე მხრივ, ინტერვიუს გულწრფელი ხასიათი „ქართულ ოცნებას“ შეიძლება დაკარგული პოზიციების დაბრუნებაში როგორმე დაეხმაროს.
მოკლედ, საქართველოს წინ აქტიური პოლიტიკური შემოდგომა ელოდება.
