«BBC»-ს მიერ გამოქვეყნებული სტატია ეხება ევროკავშირის მიერ საქართველოს მოქალაქეებისათვის დაწესებული უვიზო რეჟიმის ძალაში შესვლის წლისთავს: მასში საუბარია როგორც ვიზალიბერალიზების დადებით მნიშვნელობაზე, ასევე იმ უარყოფით ტენდენციებზე, რომლებიც თან ახლავს უვიზო რეჟიმს.

საინფორმაციო სააგენტო "ნიუსპრესი" გთავაზობთ მასალის ქართულენოვან რეზიუმეს:


„ერთი წლის განმავლობაში, 2017 წლის 28 მარტიდან, შენგენის ზონის საზღვრები 240 ათასმა საქართველოს მოქალაქემ გადაკვეთა, მაგრამ ვიზალიბერალიზაციის პირველი წლისთავის შედეგებს თან ერთგვარი ჩრდილიც ახლავს: მზარდი ნაკადი იმ ადამიანებისა, რომლებიც ევროკავშირში თავშეფრის მიღებას ითხოვენ. ამგვარ მოქმედება უვიზო რეჟიმს საფრთხეს უქმნის“, - აღნიშნულია სტატიაში.

„იმ ქვეყნისათვის, რომელიც სამომავლოდ ევროკავშირში გაწევრიანება სურს, ვიზების გაუქმებას, პრაქტიკული მნიშვნელობის გარდა, სიმბოლური მნიშვნელობაც აქვს, მაგრამ ბოლო დროს შეიმჩნევა ნეგატიური ტენდენცია, რაც თავშესაფრის მიღების მთხოვნელებისა და დანაშაულის ჩამდენთა რაოდენობის ზრდაში გამოიხატა. განგაში პირველმა გერმანიამ ატეხა, რომელმაც მწვავედ აღიქვა ქვეყანაში შესული საქართველოს მოქალაქეთა მიერ ჩადენილი დანაშაულებანი, შემდეგ კი ამას თავშესაფრის მიღების თხოვნების სწრაფი ზრდაც დაემატა. იგივე ტენდენცია შეინიშნება ევროკავშირის სხვა ქვეყნებშიც, ნორვეგიაში და შვეიცარიაში, რომლებსაც მიმდინარე წლის იანვარში 1859-მა საქართველოს მოქალაქემ მიმართა თავშესაფრის მიღების მიზნით“, - ნათქვამია სტატიაში.

„ბი-ბი-სი“-ს კორესპონდენტი ესაუბრება საქართველოს იმ მოქალაქეებს, რომლებიც ხშირად სარგებლობენ უვიზო რეჟიმის სიკეთით, ნორმალურად იქცევიან, წესებს არ არღვევენ და იმ ე.წ.„ლტოლვილებსაც“, რომლებიც ევროპაში თავშესაფრის მიღების იმედით წავიდნენ, ვერ მიიღეს და შემდეგ უკან დაბრუნდნენ.

პუბლიკაციაში გადმოცემულია საქართველოს ხელისუფლების მიერ უვიზო რეჟიმის დამრღვევთა წინააღმდეგ მიღებული ზომები. „მათგან ერთ-ერთია საქართველოს უსაფრთხო ქვეყნად აღიარება ევროკავშირის ქვეყნების მიერ. საგარეო საქმეთა სამინისტროს მონაცემების მიხედვით, საქართველო უსაფრთხო ქვეყნად ევროკავშირის უკვე რვა წევრმა აღიარა, რაც იმას ნიშნავს, რომ თავშესაფრის მთხოვნელმა წინასწარ იცის - მისი მცდელობა წარუმატებელი იქნება. ამ მიმართულებით მუშაობა გრძელდება“. თავის მხრივ, საქართველოს პარლამენტში მზადდება კანონპროექტი გვარის გამოცვლის პროცედურის გართულების შესახებ. საქმე იმაშია, რომ ევროკავშირში წასული საქართველოს მოქალაქეები, რომლებიც კრიმინალურ ქმედებაში იქნენ შენიშნულნი, დეპორტაციის შემდეგ გვარს იოლად იცვლიდნენ, შემდეგ ისევ ევროკავშირში ბრუნდებოდნენ და სამართალდარღვევებს აგრძელებდნენ.
--------
საქართველოს მოქალაქეების მიერ უვიზო რეჟიმის წესების დარღვევაზე ევროპული მასობრივი ინფორმაციის სხვა საშუალებებიც წერენ, განსაკუთრებით კი გერმანული მედია. მაგალითად, გერმანულმა ტელერადიოკომპანია Deutsche Welle-მ 28 მარტს გამოაქვეყნა სტატია სათაურით „რატომ შეიძლება საქართველო უვიზო რეჟიმის გარეშე დარჩეს“ (ავტორი - ამალია ოგნაჯანიანი - http://www.dw.com/ru/a-43150852?maca=rus-yandex_new_politics_mm-9641-xml), ხოლო 29 მარტს - „საქართველოსა და ევროკავშირს შორის უვიზო რეჟიმი საფრთხის ქვეშაა“ (ავტორი - ნიკიტა ჟოლკვერი - http://www.dw.com/ru/безвизовый-режим-между-ес-и-грузией-под-угрозой/a-43170939).