უკრაინის ხელისუფლება საქართველოს იმ მოქალაქეების დეპორტაციას განაგრძობს, რომლებიც საქართველოს ყოფილი პრეზიდენტის, ოდესის ყოფილი გუბერნატორის, ამჟამად უკრაინის ოპოზიციური პარტია „ახალი ძალების რუხის“ ლიდერის მიხეილ სააკაშვილის უახლოესი გარემოცვის წევრები არიან.
მიხეილ სააკაშვილის პირადი ვიდეოოპერატორი, პარალელურად ტელეკომპანია „რუსთავი 2“-ის კიევის ბიუროს თანამშრომელი თამაზ შავშიშვილი, მიხეილ სააკაშვილის პირადი დაცვის წევრი ზურაბ ცინცაძე, შსს-ს სპეციალური ოპერაციების ცენტრის ყოფილი უფროსი, თადარიგის ვიცე-პოლკოვნიკი მამუკა აბაშიძე და „ქართული ლეგიონის“ ყოფილი წევრი, უშიშროების თადარიგის ვიცე-პოლკოვნიკი ივანე ნადირაძე, 17 ნოემბერს, უკრაინაში, ძალის აშკარა გადამეტებით დააკავეს.
უკრაინის ჰელნისკის ჯგუფი მიიჩნევს, რომ ამ ადამიანების დეპორტირება "უკრაინის კონსტიტუციის, ადამიანის უფლებათა ევროპული კონვენციისა და უკრაინის სისხლის სამართლის კოდექსის უხეში დარღვევით მოხდა, მათ შორის, გატაცებით და თავისუფლების უკანონო აღკვეთით“.
ორი დღის მანძილზე დაკავებული ქართველების ადგილსამყოფელის შესახებ ურთიერთსაწინააღმდეგო ცნობები ვრცელდებოდა. 19 ნოემბერს კი გაირკვა, რომ ოთხივე მათგანი ბორან „ვილნიუს სივეისზე“ იმყოფებოდა, რომელიც უკრაინის ნავსადგურ ჩერნომორსკიდან 18 ნოემბერს გამოვიდა და ფოთის პორტში, 19 ნოემბერს, 22:30 საათზე შემოვიდა.
უკრაინულ ბორანზე საქართველოს კიდევ ოთხი დეპორტირებული მოქალაქეც აღმოჩნდა: ხომერიკი (მეტსახელად „ნუკრი“), მიქელაძე, შელია (მეტსახელად „ტურა“) და გოლანძია (მეტსახელად „ტოლსტი“), უკრაინის შსს-ს განცხადებით, ისინი ქურდული სამყაროს და კრიმინალური დაჯგუფების წევრები არიან.
ვიდეოოპერატორმა თამაზ შავშიშვილმა ფოთის ნავსადგურში გაიხსენა, თუ როგორ მოიტაცეს კიევიდან, საკუთარი საცხოვრებელი სახლიდან უკრაინის უსაფრთხოების სამსახურის სპეციალური დანიშნულების რაზმის წევრებმა და როგორ აღმოჩნდა ბორანზე:
„ჩემს სახლში შემოვარდნენ, სახეში ჩამარტყეს რევოლვერი, ძირს დამაწვინეს და ზემოდან ფეხებით მირტყამდნენ, "სკოჩით" ამიკრეს თვალები. მერე ჩამაგდეს „მარშუტკის“ საბარგულში, გაურკვეველი მიმართულებით წამიყვანეს. ამის მერე გამოცვალეს მანქანა, სულ ორჯერ გამოცვალეს, მერე ვერტფრენში ამიყვანეს, ძირს დამაწვინეს და გავფრინდით. სადღაც ორი საათის განმავლობაში ვიფრინეთ, ისევ მანქანაში გადამიყვანეს და ბოლოს გემზე აღმოვჩნდი. მითხრეს რომ სამი წლის ვადით აკრძალული მაქვს უკრაინაში შესვლა, იურისტები უკვე მუშაობენ და ვაპირებ გავასაჩივრო ჩემი უკანონო გატაცების ფაქტი“.
ყველაზე დიდი ხმაური უკრაინაში ივანე ნადირაძის (მეტსახელად „მოხუცი“) დაკავებამ და დეპორტაციამ გამოიწვია, რომელსაც საქართველოს ექს-პრეზიდენტმა მიხეილ სააკაშვილმა „უკრაინის სახალხო გმირი“ უწოდა.
47 წლის ივანე ნადირაძემ სამხედრო სასწავლებელი რუსეთში, ბალაშიხაში დაამთავრა. მისივე განცხადებით, საქართველოს უშიშროების სტუქტურებში თითქმის 10 წლის მანძილზე მუშაობდა და ვიცე-პოლკოვნიკის ჩინი აქვს. 2014 წელს, როცა უკრაინაში ომი დაიწყო, ივანე ნადირაძეს თბილისში, ავტომობილების ყიდვა-გაყიდვის ბიზნესი ჰქონდა, საქმე მიატოვა და მოხალისედ წავიდა.
თავიდან ვანო ნადირაძე ლუგანსკის ოლქში დისლოცირებულ „ქართულ ლეგიონს“ შეუერთდა, თუმცა ახლა ირკვევა, რომ ორი კვირის თავზე იგი ლეგიონიდან „რუსეთის სასარგებლოდ ჯაშუშობის“ ბრალდებით გააძევეს. მოგვიანებით, იგი უკრაინის რადას დეპუტატ სემიონ სემენჩენკოს გარემოცვაში მოხვდა. 2017 წლის ზაფხულში, „მოხუცი“ (ვანო ნადირაძე) დააკავეს, თუმცა დეპუტატის წინააღმდეგობის გამო, მისი დეპორტირება ვერ შეძლეს, საქმე სასამართლომდე მივიდა.
2017 წლის სექტემბერში, დეპუტატ სემენჩესკოს პირად დაცვასთან და ბატალიონ „დონბასის“ ყოფილ მებრძოლებთან ერთად, ვანო ნადირაძე აქტიურ მონაწილეობას იღებდა, პოლონეთი-უკრაინის საზღვარზე მომხდარ იმ მოვლენებში, რომლის დროსაც მოქალაქეობა ჩამორთმეული მიხეილ სააკაშვილი უკრაინაში დაბრუნდა. 17 ოქტომბრიდან ვანო ნადირაძე მიხეილ სააკაშვილის მიერ კიევში, რადას წინ ორგანიზებული „ვეჩეს“ და კარვების ქალაქის დაცვის უფროსი იყო. ამ საპროტესტო აქციაზე, რომელიც უკრაინაში "მიხომაიდანად" მონათლეს, პრეზიდენტ პოროშენკოსა და მთავრობის გადადგომას ითხოვენ.
აღმოსავლეთ უკრაინაში მებრძოლი „ქართულ ლეგიონის“ მეთაურის მოადგილე შოთა კედელაშვილი ამბობს, რომ ვანო ნადირაძემ საქართველოში სასჯელი ორჯერ მოიხადა. მათ შორის, გამოძალვის გამო.
„ქართულ ლეგიონის“ მეთაურის მამუკა მამულაშვილის აზრით კი, უკეთესი იქნებოდა თუ ვანო ნადირაძეს „ჯაშუშობისა და სხვა დანაშაულებისთვის" უკრაინაშივე გაასამართლებდნენ, მისი ინფორმაციით, ვანო ნადირაძეზე უკრაინაში 10-მდე სისხლის სამართლის საქმეა აღძრული: „ვანო ნადირაძე საქართველოში გასამართლებული იყო ექს-პრეზიდენტ ედუარდ შევარდნაძეზე მოწყობილი ტერორისტული აქტის გამო. „ქართულ ლეგიონში“ მისი გამოჩენიდან სამ დღეში, ჩვენი მებრძოლების შესახებ ინფორმაცია, სახელებით, გვარებითა და დაბადების თარიღებით რუსულ პრესაში მოხვდა. სულ 10 დღე იყო ჩვენთან, ეს ჩემი შეცდომა იყო. მისი შემდგომი ბედი ჩემთვის უცნობია, რადგან იგი სირცხვილით გავაგდეთ ლეგიონიდან. სწორედ ასეთი ადამიანები ახდენენ იმ მებრძოლების დისკრედიტაციას, რომლებიც უკრაინისთვის იბრძვიან“.
„ქართული ლეგიონის“ უმძიმეს ბრალდებას ჯერჯერობით არ გამოხმაურებია არც თავად დეპორტირებული ვანო ნადირაძე და არც ექსპრეზიდენტი მიხეილ სააკაშვილი, რომლის გარემოცვაშიც შედიოდა უშიშროების ვიცე-პოლკოვნიკი ბოლო თვეების მანძილზე.
ვანო ნადირაძესთან დაკავშირებით „ქართული ლეგიონის“ პოზიციაზე, უკრაინაში მებრძოლი ქართველი მოხალისეების სხვადასხვა ჯგუფებს არაერთგვაროვანი რეაქცია ჰქონდათ. ამიტომ ექსპერტები არ გამორიცხავენ, მათ შორის, დაპირისპირების გაღრმავებას, რაც, ბუნებრივია, ხელს აძლევს უკრაინის ხელისუფლებას და კიდევ უფრო ასუსტებს მიხეილ სააკაშვილის შერყეულ პოზიციებს.
უკრაინის ხელისუფლებამ ანალოგიურად, უხეში ძალის გამოყენებით, 22 ოქტომბერს, ქვეყნის ტერიტორია ოდესის ყოფილი გუბერნატორის გარემოცვის სამ წევრს: სააკაშვილის პირადი დაცვის უფროსს გიორგი რუბაშვილს, პირად მძღოლს მიხეილ აბზიანიძეს და საქართველოს შეიარაღებული ძალების მომზადებისა და შეფასების დეპარტამენტის ყოფილი უფროსს, თადარიგის პოლკოვნიკ დავით მაყიშვილის დაატოვებინა, რომელმაც უკრაინელი მებრძოლების გაწვრთნაში დიდი წვლილი შეიტანა.