ბორჯომის ხეობაში ამ დროისთვის ხანძარი სრულად ლიკვიდირებულია.
ამის შესახებ საქართველოს პრემიერმა გიორგი კვირიკაშვილმა ჟურნალისტებთან საუბრისას განაცხადა.
„პირადად შემოვიარე, ყველა კრიტიკული ლოკაცია. შეიძლება ითქვას, რომ ხანძარი არის ლიკვიდირებული. შესაძლოა მომდევნო დღეებში იყოს ცალკეული სახანძრო წერტილოვანი კერები, რასაც შესაბამისად მივხედავთ. სწორედ ამიტომ, შტაბი მომდევნო დღეებშიც გააგრძელებს მუშაობას. ტექნიკა იქნება მობილიზებული, იმისათვის რომ ასეთი წერტილოვანი კერები იქნას ოპერატიულად ჩაქრობილი. რა თქმა უნდა, გამოვიარეთ ძალიან სერიოზული კრიზისული დღეები, ამ დღეების განმავლობაში იყო ბევრი კრიტიკაც, იყო ბევრი თბილი სიტყვაც, მაგრამ მინდა ვთქვა, რომ არც ერთი ჩვენგანის, ვინც ახლა აქ ვიმყოფებით, მთავრობის წევრის შრომა არ არის მოსატანი ერთი ცალკეული ადამიანის თავდადებასთან, რომელიც ჩვენ ვნახეთ ამ ბოლო დღეების განმავლობაში. იმ წერტილებში სადაც იყო სიცოცხლის რისკიც კი, ამ ადამიანებმა შეძლეს და ჩვენი ქვეყნის სიმდიდრის, ულამაზესი ტყის დიდი მასივი გადაარჩინეს განადგურებისგან. ამიტომ მე ქედს ვიხრი თითოეული მათგანის თავდადების წინაშე და მინდა გითხრათ, რომ ეს გამოწვევა ჩვენმა ქვეყანამ ღირსეულად გადალახა. დიდი მადლობა ყველას“-განაცხადა პრემიერმა.