არასამთავრობო ორგანიზაცია „საერთაშორისო გამჭვირვალობა-საქართველოს“ სოციალური დაზღვევის სფეროში კანონმდებლობის დახვეწა აუცილებლობად მიაჩნია.
როგორც ორგანიზაციაში აცხადებენ, მიუხედავად ჯანდაცვის უწყების განცხადებებისა დაზღვევის წარმატებულობის შესახებ, სისტემაში რამდენიმე სახის პრობლემა და ხარვეზი იკვეთება. კერძოდ, სადაზღვევო კომპანიები არ ანაზღაურებენ პაციენტთა გასინჯვისა და მკურნალობის ხარჯებს და თავად განსაზღვრავენ ანაზღაურებადი მედიკამენტების ჩამონათვალს. შედეგად, ზოგიერთი სადაზღვევო კომპანია მედიკამეტების ღირებულებას მხოლოდ ერთ რომელიმე ფარმაცევტულ კომპანიას უნაზღაურებს.
ორგანიზაციას ამის მიზეზად სადაზღვევო სისტემაში მკვეთრად განსაზღვრული წესების ნაკლებობა და სადაზღვევო კომპანიების თავისუფლება მიაჩნია - თავად გადაწყვიტონ, სჭირდება თუ არა პაციენტს მკურნალობა და რომელი მედიკამენტებით შეიძლება შედეგის მიღწევა.
მათი აზრით, უარყოფითია ისიც, რომ მომხმარებელს სადაზღვევო კომპანიის არჩევა თავად არ შეუძლია. ზემოაღნიშნულის დასტურად ორგანიზაციას ჭიათურის მკვიდრი პენსიონერის მაგალითი მოჰყავს, რომელიც სადაზღვევო კომპანია „ალფაშია“ დაზღვეული.
„საერთაშორისო გამჭვირვალობის“ ინფორმაციით, სადაზღვევო ხელშეკრულების მიხედვით, კომპანია ვალდებულია მედიკამენტების ღირებულება, 50 ლარი, ყოველთვიურად აუნაზღაუროს კლიენტს, თუმცა, ამ ვალდებულებას არ ასრულებს, ვინაიდან „ალფა“, „ავერსში“ შეძენილი მედიკამენტების ღირებულებას ანაზღაურებს, ხოლო პაციენტს სხვა წარმოების მედიკამენტი ესაჭიროება.
„თეორიულად, სადაზღვევო კომპანია ვალდებულია, საკუთარ თავზე აიღოს შესაბამისი პასუხისმგებლობა, მაგრამ პრაქტიკულად, ის ამას არ აკეთებს“-ნათქვამია „საერთაშორისო გამჭვირვალობა-საქართველოს“ განცხადებაში.
ორგანიზაციაში მიაჩნიათ, რომ პრობლემის სათავე შესაბამისი კანონმდებლობის გარკვეული ნაწილის ბუნდოვანებაა.
„საერთაშორისო გამჭვირვალობა-საქართველოს“ განმარტებით, პრობლემას სოციალური დაზღვევის სფეროში განხორციელებული ცვლილებაც წარმოშობს, რომლის მიხედვით, ვაუჩერზე დაფუძნებული სისტემიდან რეგიონულ სისტემაზე გადასვლა ხდება. პირველ შემთხვევაში, მომხმარებელს სადაზღვევო კომპანიის არჩევის თავისუფლება ჰქონდა, რეგიონული სისტემის პირობებში კი ერთი სადაზღვევო კომპანია რეგიონის მთელ მოსახლეობას ემსახურება. ორგანიზაციის განცხადებით, ამ სისტემაზე გადასვლის შემდეგ მომხმარებლს აღარ შეუძლია სადაზღვევო კომპანიის თავად არჩევა და ის რეგიონული სადაზღვევო კომპანიის გადაწყვეტილებებზე ხდება დამოკიდებული.
„მთავრობის მცდელობა - უშუამდგომლოს დამზღვევებს, საავადმყოფოებსა და პაციენტებს, წინ გადადგმული ნაბიჯია ამ პრობლემებთან მიმართებაში. თუმცა, უკეთესი კანონმდებლობა, რომელიც სადაზღვევო კომპანიების ვალდებულებებს განსაზღვრავს და ანაზღაურებადი მედიკამენტების სტანდარტულ სიას დააწესებს, მნიშვნელოვნად შეუწყობს ხელს, რომ სოციალური დაზღვევა უფრო სოციალური გახდეს“-ნათქვამია ორგანიზაციის განცხადებაში.