„მე-9 არხის“ ბრიუსელის ბიუროს კორესპონდენტი, ჟურნალისტი გიორგი ფოფხაძე აცხადებს, რომ სასჯელაღსრულების დაწესებულების თანამშრომელი, ამჟამად  ბრუსელში მყოფი ვლადიმერ ბედუკაძე, რომელმაც პატიმართა წამების ფაქტები გადაიღო, სისტემის მსხვერპლი იყო.

„ბედუკაძე აცხადებს, რომ ციხის დირექტორის დავალებით მას მისცეს კამერა, რომლითაც ყველაფერი უნდა გადაეღო. ეს გრძელდებოდა ძალიან დიდი ხანი. ეს კაცი მეუბნება, რომ ერთ დღეს დადგა მომენტი, როდესაც ეს უკვე აღარ შემეძლოო“-აღნიშნა ფოფხაძემ ეკა ბერიძის გადაცემა „მთავარ კითხვაში“.

ჟურნალისტის განმარტებით, ბედუკაძე აცხადებს, რომ ყველა ვიდეო შს ახლანდელ მინისტრ ბაჩო ახალაიასთან მიდიოდა. ამ საკითხზე მან „ფაინენშელ თაიმსთანაც“ ისაუბრა.

„ციხის უფროსი ახალაიას აჩვენებდა ამ კადრებს იმისთვის - ნახეთ, ჩვენ რა კარგად ვმუშაობთო“-განაცხად ფოფხაძემ.

ამასთან, ფოფხაძე სისულელეს უწოდებს ინფორმაციას, თითქოს ბედუკაძემ მასალის გასაჯაროებაში ვინმესგან ფული აიღო. ჟურნალისტი აცხადებს, რომ სამი თვის განმავლობაში სასჯელაღსრულების დაწესებულების ყოფილ თანამშრომელს ბრიუსელში მეგობრები ინახავდნენ.

ჟურნალისტი აცხადებს, რომ ბედუკაძე სამსახურიდან არ გამოუშვიათ, მან წასვლის შესახებ განცხადება თავად დაწერა.

გარდა ამისა, ფოფხაძის განმარტებით, პატიმრების წამების კადრების გასაჯაროება მას შსს-ს მიერ გავრცელებულმა ვიდეომ დააჩქარებინა.

„მე-9 არხის“ ბრიუსელის ბიუროს კორესპონდენტი აცხადებს, რომ წამების შემზარავი ფაქტების ამსახველი ვიდეო-კადრების გაშვება „მე-9 არხის“ ეთერით მას შემდეგ გადაწყვიტა, რაც შსს-მ გაავრცელა კადრები და განმარტა, რომ პატიმრის ცემა სასჯელაღსრულების დაწესებულების თანამშრომლებს „ქართულ ოცნებასთან“ დაკავშირებულმა პატიმარმა თამაზ თამაზაშვილმა ფულის სანაცვლოდ შეუკვეთა.

ფოფხაძე მომხდარის ვერსიებზეც საუბრობს. მისი ინფორმაციით, ერთ-ერთმა ევროდეპუტატმა, რომელსაც ვიდეო თავად ფოფხაძემ დაუტოვა, დაიბარა საქართველოს ელჩი და საქართველოს ციხეებში არსებულ ვითარებაზე განმარტება მოსთხოვა.

დეპუტატის ვინაობას ჟურნალისტი არ ასახელებს, თუმცა აცხადებს, რომ ის ფრანგი „მწვანეების“ წარმომადგენელია.

„ამის შემდეგ ელჩი გამოვიდა, დარეკა მიხეილ სააკაშვილთან და მოაწყვეს ის სპექტაკლი. მე ვიყავი იძულებული, გამეკეთებინა კონტრშეტევა“-აღნიშნა მან და დასძინა, რომ სწორედ ამის შემდეგ დაურეკა „მე-9 არხის“ დირექტორს და კადრების ნაწილის გაშვება სთხოვა.

ჟურნალისტი აცხადებს, რომ ვიდეოს გასაჯაროება მანამდე არ იგეგმებოდა, ვიდრე ბედუკაძის ოჯახი საქართველოს არ დატოვებდა და მათი უსაფრთხოება დაცული არ იქნებოდა. მისი თქმით, ბედუკაძეს მცირეწლოვანი შვილები ყავს და მისი ოჯახი, ფაქტორივად, მძევალია.