საქართველოს პარლამენის მიერ 2011 წლის ნოემბერში მიღებული კანონი "უცხოეთში მცხოვრები თანამემამულეებისა და დიასპორული ორგანიზაციების შესახებ
" ძალაში დღეიდან შევიდა.
აღნიშნულთან დაკავშირებით დიასპორის საკითხებში სახელმწიფო მინისტრი პაპუნა დავითაია და სამოქალაქო რეესტრის თავმჯდომარის მოადგილე გიორგი გაბრიელაშვილი უცხოეთში მცხოვრებ თანამემამულეებს კონსულტაციებს გაუწევენ.
შეხვედრა რუსთავის იუსტიციის სახლში იგეგმება. საუბარი შეეხება იმ საკითხს, თუ რა პროცედურებია საჭირო თანამემამულის მოწმობის მისაღებად.
კანონპროექტი დიასპორის საკითხებში სახელმწიფო მინისტრის აპარატმა მოამზადა. იგი უცხოეთში მცხოვრები თანამემამულის სტატუსის განსაზღვრას და შესაბამისი დასკვნების საფუძველზე თანამემამულის დამადასტურებელი მოწმობის გაცემის საკითხებს არეგულირებს.
კანონის შესაბამისად, თანამემამულის სტატუსის მქონე უცხოეთის მოქალაქეებს გარკვეული პრივილეგიები მიენიჭებათ. ისინი შეძლებენ განსაზღვრული ვადით იმყოფებოდნენ საქართველოს ტერიტორიაზე, უფლებამოსილნი იქნებიან სახელმწიფოს დაფინანსებით მიიღონ ზოგადი და უმაღლესი განათლება საქართველოში და სხვა.
