საქართველოს განათლების, მეცნიერების, კულტურის და სპორტის სამინისტრომ და განათლების ხარისხის განვითარების ეროვნულმა ცენტრმა, გაერთიანებული სამეფოს კარგი მმართველობის ფონდთან (GGF) თანამშრომლობით, კვალიფიკაციების ჩარჩოს მე-5 საფეხურის ახალი პროგრამები შეიმუშავეს.

პროგრამების განხილვის მიზნით, დაინტერესებულ მხარეებთან სამუშაო შეხვედრა დღეს გაიმართა.

მოკლე ციკლის (ასოცირებული ხარისხი) ორწლიანი საგანმანათლებლო პროგრამა პროფესიულ და უმაღლეს განათლებას შორის დამაკავშირებელ ხიდს წარმოადგენს. მისი მიზანია, შრომის ბაზრის მოთხოვნების შესაბამისი ტექნიკური ცოდნის და უნარების მქონე პროფესიონალების მომზადება.

განათლების, მეცნიერების, კულტურისა და სპორტის სამინისტროს
სტრატეგიული კომუნიკაციის დეპარტამენტის ცნობით, პროგრამის დასრულების შემდეგ, სტუდენტებს საშუალება ექნებათ კრედიტების აღიარებით, სწავლა საბაკალავრო პროგრამაზე გააგრძელონ ან სამუშაო ბაზარზე გავიდნენ, სადაც ამ საფეხურის შესაბამის მაღალ კვალიფიკაციებზე მნიშვნელოვანი მოთხოვნა არსებობს, როგორც ადგილობრივად, ისე ევროპაში.

ახალი პროგრამების დანერგვა 2020 წლიდან არის დაგეგმილი.