მედიის სამართლებრივი დაცვის ცენტრი კონტროლის პალატას ჟურნალისტებისთვის პროფესიული მოვალეობის განხორციელებისას  ხელის შეშლაში ადანაშაულებს და სამართალდამცავ ორგანოებს ამ ფაქტების დეტალურად შესწავლას და გამოძიებას სთხოვს.
აღნიშნულთან დაკავშირებით ახალგაზრდა იურისტთა ასოციაციასთან არსებულმა ქართული მედიის სამართლებრივი დაცვის ცენტრმა განცხადება გაავრცელა.
როგორც განცხადებაშია ნათქვამი, მიუხედავად იმისა, რომ კანონის თანახმად, ადმინისტრაციული წარმოების პროცესი ღიად უნდა განხორციელებულიყო, ჟურნალისტებს მუნიციპალიტეტის შენობაში შესვლის უფლებაც კი არ მისცეს.
ამ ფაქტების გათვალისწინებით, ცენტრი მიიჩნევს, რომ კონტროლის პალატის თანამშრომლები, რეგიონებში მოქალაქეების დაკითხვის პროცესზე ჟურნალისტების არ დაშვებით, მედიის საქმიანობას უკანონოდ უშლიან ხელს.