შინაგან საქმეთა სამინისტროს მიერ შეიარაღებული დაჯგუფების დევნის ოპერაციის დროს სპეცდანიშნულების რაზმის 3 თანამშრომელი დაიღუპა.

შსს-ს ოფიციალური ინფორმაციით, დაჭრილია სპეცდანიშნულების რაზმის 5 თანამშრომელი.  

რაც შეეხება დივერსანტთა ჯგუფს, უწყების ცნობით, ლიკვიდირებულია შეიარაღებული დაჯგუფების 11 წევრი. ამჟამად, ალყაშია მოქცეული 6 დივერსანტი და მიმდინარეობს მათი დაკავების ღონისძიება.

შს და თავდაცვის სამინისტროები მწუხარებას გამოთქვამენ და გარდაცვლილთა ოჯახებს უსამძიმრებენ. 

საქართველო-რუსეთის საზღვრის დაღესტნის მონაკვეთთან, საქართველოს ტერიტორიაზე, შეიარაღებული ჯგუფის აღმოჩენის შესახებ ინფორმაცია შსს-მ დღეს გაავრცელა.

გავრცელებული ინფორმაციით, სავარაუდოდ, დაღესტნიდან დივერსანტთა ჯგუფი გადმოვიდა, რომელმაც რამდენიმე დღის წინ გაუჩინარებული 5 პირის გარდა, მძევალთა კიდევ ორი ჯგუფი აიყვანა.

მათ გასათავისუფლებლად ინტენსიური სროლა მთელი ღამის განმავლობაში მიმდინარეობდა.