თბილისის საქალაქო სასამართლომ კოალიცია „ქართული ოცნების“ ლიდერს ბიძინა ივანიშვილს 20 43 827 ლარი ჯარიმა დააკისრა.
სასამართლოს გადაწყვეტილებით, ივანიშვილმა ჯარიმა 7 დღის ვადაში უნდა გადაიხდოს,  ხოლო, მას სააპელაციო სასამართლოში 48 საათში შეუძლია გადაწვეტილების გასაჩივრება.
სასამართლო პროცესზე მოსამართლე ნანა დარასელიამ სახელმწიფო აუდიტის სამსახურის წარმომადგენლების მოთხოვნა არ გაითვალისწინა და 5 მლნ. 552 ათას 135 ლარიდან 4 მლნ. 48 ათას 765 ლარი დაუსაბუთებელ თანხად მიიჩნია.
ამასთან, დაცვის მხარემ სასამართლოს წარუდგინა ვიდეოფირი და ნოტარიულად დამტკიცებული დოკუმენტი, სადაც საუბარია, რომ ივანიშვილის მიერ გამოტანილი თანხა დახარჯული არ არის და ნაღდი ფულის სახით კონკრეტულ მისამართზეა შენახული.
ივანიშვილის ადვოკატებმა სანდრო ბარამიძემ და შალვა თადუმაძემ აუდიტის სამსახურის წამომადგენლებს შეთავაზეს, რომ პირადად აჩვენებდნენ აღნიშნულ თანხას, რაზეც მათ უარი განაცხადეს და აღნიშნეს, რომ „ეს სხვა ფულია“.
მიუხედავად იმისა, რომ კოალიციის ლიდერის პირადი ანგარიშებიდან ზემოთ აღნიშნული თანხის გარდა, სხვა საბანკო ოპერაცია არ არის დაფიქსირებული, სასამართლომ დაცვის მხარის მტკიცებულება არ გაითვალისწინა და ივანიშვილი თანხის ხუთმაგი ოდენობით დააჯარიმა.
სახელმწიფო აუდიტის სამსახურის წარმომადგენლების ვარაუდით, თანხა, რომელიც ივანიშვილმა ნაღდი ფულის სახით თავისი ანგარიშებიდან გამოიტანა, მეორე პირის გამოყენებით კოალიცია „ქართულ ოცნებაში“ შემავალ პარტიებს შემოწირულობის სახით გადაურიცხა.
აღსანიშნავია, რომ სასამართლო პროცესზე მეორე პირის მიერ თანხის გადარიცხვასთან დაკავშირებით აუდიტის სამსახურს კონკრეტული მტკიცებულები არ წარუდგენია.
ივანიშვილის ადვოკატებმა მოსამართლე ნანა დარასელიას აცილება მოითხოვეს, თუმცა, სასამართლომ მათი შუამდგომლობა არ დააკმაყოფილა.
სახელმწიფო აუდიტის სამსახურმა პოლიტიკური კოალიცია „ქართული ოცნების“ ლიდერს ბიძინა ივანიშვილსა და კოალიციის მაჟორიტარი დეპუტატობის კანდიდატს კახი კალაძეს ანგარიშებიდან გატანილი თანხის უკან დაბრუნების წინადადებით მიმართა. აუდიტის სამსახურის ინფორმაციით, დასახელებულ პერიოდში ივანიშვილმა 5.552.135, ხოლო კახი კალაძემ 3.388.992 ლარი გაანაღდა.
სასამართლომ დეპუტატობის კანდიდატის კახი კალაძის უძრავ-მოძრავ ქონებას ყადაღა გუშინ დაადო და ჯარიმის სახით 16 944 960 ლარი დააკისრა.