საკონსტიტუციო სასამართლომ პარლამენტის წინააღმდეგ ახალგაზრდა იურისტთა ასოციაციისა (საია) და მოქალაქე თამარ ხიდაშელის სარჩელი დააკმაყოფილა.

როგორც "ნიუსპრესს" ახალგაზრდა იურისტთა ასოციაციიდან აცნობეს, აღნიშნული სარჩელით მათ სასამართლოს 2008 წლის ოქტომბერში მიმართეს. სარჩელი "ოპერატიული-სამძებრო საქმიანობის შესახებ" კანონის მე-8 მუხლის მე-2 პუნქტის არაკონსტიტუციურად ცნობას ეხებოდა.

აღნიშნული ნორმის შესაბამისად, პროკურორის თანხმობით, ოპერატიულ-სამძებრო ღონისძიების ჩატარების ვადა შეიძლებოდა გაგრძელებულიყო 6 თვემდე. ეს კი, სამართალდამცავ ორგანოებს შესაძლებლობას აძლევდა, ექვსი თვის განმავლობაში, მოსამართლის ბრძანების გარეშე, ფარული მოსმენები ეწარმოებინათ კონკრეტული პირების მიმართ. ნორმით საქართველოს კონსტიტუციის მე–20 მუხლის პირველი პუნქტი, კერძოდ, ადამიანის პირადი ცხოვრების ხელშეუხებლობის უფლება ირღვეოდა .

საკონსტიტუციო სასამართლომ დააკმაყოფილა საიას სარჩელი და სადავო ნორმა არაკონსტიტუციურად ცნო.