აღსრულების ეროვნული ბიურო დღეს თბილისის საქალაქო სასამართლოს შუამდგომლობით მიმართავს,  რომელიც კანონმდებლობის შესაბამისად, 24 საათის განმავლობაში გადაწყვეტს ქონების იძულებითი მართვის შეწყვეტისა და მესაკუთრისთვის მმართველობაში მისი დაბრუნების შესახებ.
ამის შესახებ განცხადებას აღსრულების ეროვნული ბიურო ავრცელებს, რომელშიც ნათქვამია, რომ 2012 წლის 24 ივლისს ბიძინა ივანიშვილმა სრულად დაფარა თბილისის სააპელაციო სასამართლოს მიერ გაცემული სააღსრულებო ფურცლებით დაკისრებული თანხა 74,325,065.65 ლარი და აღსრულების საფასური 5,202,754.60 ლარის ოდენობით.
თბილისის საქალაქო სასამართლოს 15 ივნისის გადაწყვეტილებით, ბიძინა ივანიშვილს დაეკისრა ჯარიმა პოლიტიკური პარტიის სასარგებლოდ უკანონო შეწირულობის განხორციელებისთვის. თბილისის სააპელაციო სასამართლოს მიერ გაცემული #4/ა-131-12 და #4/ა-129-12 სააღსრულებო ფურცლების აღსრულების უზრუნველყოფის მიზნით გამოცხადებულ აუქციონზე, რომელზეც გამოტანილი იყო ბიძინა ივანიშვილის აქციების 100% სს ,,ქართუ ჯგუფში" და აქციების 21.7% სს „პროგრეს ბანკში", აქციების რეალიზაცია არ მოხდა კანონით გათვალისწინებულ ვადაში.
აღსრულების ეროვნული ბიუროს შუამდგომლობის საფუძველზე თბილისის საქალაქო სასამართლომ მიიღო გადაწყვეტილება სს ,,ქართუ ჯგუფი"-ს აქციათა 100%-ისა და სს ,,პროგრეს ბანკი"-ს აქციათა 21,71450%-ის მმართველის დანიშვნის თაობაზე.