კომპანია „ჯორჯიან მანგანეზის“ დროებითი მმართველი ნიკოლოზ ჩიქოვანი ჭიათურასა და ზესტაფონში ეკოლოგიური მდგომარეობის გამოსწორებისთვის, სამოქმედო გეგმაზე მუშაობს.
როგორც ჩიქოვანმა პორტალ „კვირას“ პრესკლუბში განმარტა, გეგმა შლამსაცავის აშენებას, ახალი გამამდიდრებელი ფაბრიკის ჩამოტანას და სხვა საკითხებს გულისხმობს. სამუშაო გეგმის დასრულებული ვარიანტის პრეზენტაციას ჩიქოვანი 11 ივნისს გეგმავს.

სამოქმედო გეგმის საბოლოო დამუშავებამდე ახალმა მმართველმა ადგილზე უკვე შექმნა ეკოლოგიის სამსახური, რომელიც ადგილზე არსებულ მდგომარეობას მუდმივად შეისწავლის და ეკოლოგიური პრობლემების დაძლევის გზებს დასახავს.

ახალ მმართველს სასამართლომ სრული წარმომადგნლობითი უფლებები მიანიჭა, თუმცა ნიკოლოზ ჩიქოვანი კომპანიის ძველ მენეჯმენტს და აქციონერებს უკვე შეხვდა და მათ „ჯორჯიან მარგანეცის“ ერთობლივი მართვა შესთავაზა.

„11 ივნისს გავმართავთ პრეზენტაციას და წარვადგენ ჩვენს სამოქმედო გეგმას იმის შესახებ თუ რა მიმართულებით ვიმუშავებ ეკოლოგიის პრობლემების გამოსასწორებლად. გეგმა ახლა დამუშავების პროცესშია. პირველ რიგში უნდა აშენდეს და მოეწყოს შლამსაცავი, უნდა მოხდეს ახალი, გამამდიდრებელი ფაბრიკის ჩამოტანა ... მნიშვნელოვანი პრობლემა იყო ჭიათურაში ლაბორატორიის არ არსებობა, დავიწყეთ ლაბორატორიის შექმნა. გაუქმებული იყო ეკოლოგიური სამსახური, რომელიც აღვადგინე. შევკრიბე პროფესიონალების ჯგუფი, რომლებიც ყოველკვირეულად გააკეთებენ ანგარიშს. რაც შეეხება თანამშროლებს, მათი გათავისუფლება არ მოხდება, ყველა თანამშრომელი ადგილზე რჩება. მე სასამართლომ სრული წარმომადგენლობითი უფლებები მომანიჭა. დანიშვნისთანავე შევხვდი ძველ მენეჯმენტს, აქციონერებს და მათ ერთობლივი გახსნილი მუშაობა შევთავაზე. გავრცელდა ჭორები თითქოს სახელმწიფო, კომპანიის ექსპრობრიაციას აპირებს. არავითარ შემთხვევაში, ეს ასე არ არის. მე პატივს ვცემ სხვის საკუთრებას და ამიტომ მათ ერთობლივი მართვა შევთავაზე. მე ვაპირებ რომ ისინი საქმის კურსში იყონ ყველა იმ ოპერაციის შესახებ რასაც დავაპირებთ და თუ სურვილი ექნებათ ერთად განვახორციელებთ ამას, ჩემი ხელმძღვანელობით“- განაცხადა ნიკოლოზ ჩიქოვანმა.

ჩიქოვანის თქმით, ყველაზე დიდი პრობლემა ზესტაფონში დამტვერიანებაა. მისი თქმით, ჯერ კიდევ მაშინ როდესაც ის ფეროს შენადნობი ქარხნის დირექტორი იყო, 2003 წელს ფეროს ქარხნის მთელი ფილტრების სისტემა გამოიცვალა და ამან მაშინ მკვეთრად გააუმჯობესა მდგომარეობა. რაც შეეხება ჭიათურას, კომპანიის ახალი მმართველის განცხადებით, ჭიათურაში ძალიან მძიმე ვითარებაა, რომლის გადასაჭრელადაც მისი თქმით, სახელმწიფომ აქტიური მუშაობა დაიწყო.

„ ქარხანაა საყიდელი რომელიც 100% ით გამოასწორებს მდინარეში ჩამდინარე მანგანუმის პრობლემას. ქარხნის მთელი ნარეცხი მდინარეში ჩაედინება, არ არის შლამსაცავი, არის ხმაურის, მტვრის პრობლემა. ეს კატასტროფული მდგომარეობა ჭიათურაში წლებია არსებობს და ძალიან კარგია რომ სახელმწიფომ ამ პრობლემების მოგვარება დაიწყო. თუ ეს პრობლემები არ მოგვარდა თაობების დაავადებას გამოიწვევს. ეს პრობლემები იმედია გადაწყდება იმ სამწლიან პერიოდში რა პერიოდითაც მე დავინიშნე მმართველად. ჩვენ ახლა მოლაპარაკების რეჟიმში ვართ, ვუკვეთავთ ახალ ქარხანას. ასევე საჭიროა რეკულტივაციის სამუშაოები სხვადასხვა კარიერებზე“- განაცხადა ნიკოლოზ ჩიქოვანმა.

შეგახსენებთ რომ გარემოსა და ბუნებრივი რესურსების სამინისტრომ, როგორც ლიცენზიისა და ნებართვის გამცემმა ადმინისტრაციულმა ორგანომ, მიიღო გადაწყვეტილება შპს ,,ჯორჯიან მანგანეზში“, საქართველოს კანონმდებლობის სრული დაცვითა და სასამართლოს თანხმობით 11 მაისს სპეციალური მმართველი შეიყვანა.