კოალიცია „ქართული ოცნების“ ლიდერთან ბიძინა ივანიშვილთან დაკავშირებულ საკონსტიტუციო ცვლილებების პროექტზე დღეს იურიდიულ საკითხთა  კომიტეტი იმსჯელებს.

კომიტეტის თავმჯდომარის პავლე კუბლაშვილის განცხადებით, დღეს 11:00 საათზე კომიტეტის სხდომა გაიმართება, სადაც საკონსტიტუციო ცვლილებების საბოლოო ფორმულირება დარიგდება.

კომიტეტის სხდომის შემდეგ, ცვლილებებზე მეორე მოსმენით პარლამენტის რიგგარეშე სხდომაზე იმსჯელებენ.

ჯერ არ კონკრეტდება თუ როგორი იქნება საკონსტიტუციო ცვლილებების საბოლოო ფორმულირება, რომელიც ბიძინა ივანიშვილის არჩევნებში მონაწილეობის მიღებას უკავშირდება. პირველი მოსმენით მიღებული ფორმულირება კი ასეთია - „2014 წლის 1 იანვრამდე საპარლამენტო და საპრეზიდენტო არჩევნებში მონაწილეობის და ხმის მიცემის უფლება საქართველოს მოქალაქეებთან ერთად შესაბამისი ასაკიდან ასევე აქვთ პირებს, რომლებიც დაბადებული არიან და ბოლო 10 წელი მუდმივად ცხოვრობენ საქართველოში და ევროკავშირის წევრი სახელმწიფოს მოქალაქეობა აქვთ“.