პარტია „თავისუფალი საქართველოს“ პოლიტიკური მდივანი თენგიზ ომანიძე და  „თავისუფალ სტუდენტთა კავშირის“ თავმჯდომარე ირაკლი ყიფიანი, ნატოს გენერალური მდივნის განცხადებას ეხმაურებიან და მას საქართველოს სიდა საქმეებში ჩარევის მცდელობად აფასებენ.

„გვსურს ნატოს გენერალურ მდივანს შევახსენოთ ქართული საზოგადოებისთვის კარგად ცნობილი მოვლენები. აწ უკვე ბრალდებულ ახალაიას სასჯელაღსრულების დეპარტამენტის უფროსობისას ქართულ ციხეებში ხდებოდა პატიმრების სასტიკი წამება, რისი ამსახველი ვიდეო მასალაც საზოგადოებამ იხილა. არსებობს არაერთი მოწმე, რომელიც ადასტურებს, რომ პირადად ახალაია მონაწილეობდა 2006 წელს ე.წ. ციხის ბუნტის დროს პატიმრების მიზანმიმართულ მკვლელობებში. მისი ამ უწყებაში ყოფნისას, ციხეებში გაურკვეველ ვითარებაში გარდაიცვალა ასობით მსჯავრდებული, რომლებიც დაპატიმრებამდე სრულიად ჯანმრთელები იყვნენ.

ბაჩანა ახალაიას უშუალო ხელმძღვანელობით (სხვა ძალოვან მინისტრებთან ერთად) საქართველოში წლების მანძილზე ხდებოდა ოპოზიციურად განწყობილი ადამიანების დევნა, 7 ნოემბრის და 26 მაისის მშვიდობიანი მანიფესტაციების სისხლიანი დარბევა და სხვა სახის პოლიტიკური რეპრესიების განხორციელება.

საზოგადოებაში არსებული საფუძვლიანი მოსაზრებით, სწორედ ახალაია ხელმძღვანელობდა ე.წ. ზონდერ-ჯგუფებს, რომლებიც უმოწყალოდ უსწორდებოდნენ მშვიდობიან მომიტინგეებს და დევნიდნენ ჩვენს თანამებრძოლებს განსხვავებული აზრის გამო.

მისი თავდაცვის მინისტრობისას, ჩვეულებრივ მოვლენად იქცა სამხედროებისთვის პატივის და ღირსების შელახვა. არაერთი სამხედრო მოსამსახურის ჩვენებიდან ცნობილი გახდა, რომ ბატონი ახალაია და მასთან დაახლოებული პირები ფიზიკურად, ღირსების შემლახავი მეთოდებით უსწორდებოდნენ ყველა ჯარისკაცსს, ვის მიმართაც რაიმე მოსაზრებით უარყოფითად განეწყობოდნენ“ - ნათქვამია „თავისუფალი საქართველოს“ მიერ გავრცელებულ განცხადებაში.

განცხადების თანახმადვე, საქართველოს დღეს ასობით პოლიტიკური და ათასობით ნაწამები პატიმარი ჰყავს. თბილისის ქუჩებში გაუსამართლებლად ჩახოცილია ასამდე ახალგაზრდა. 2004-2012 წლებში საქართველოში ყველა არჩევნები ძალოვანი სტრუქტურების მხრიდან ტერორის, მოსახლეობის დაშინების და პროპაგანდისტული მედიის ფონზე მიმდინარეობდა. ყოველივე ამის უშუალო შემოქმედი თუ არა, ერთ-ერთი ხელმძღვანელი სწორედ ბაჩანა ახალაია იყო.

„მივიჩნევთ, რომ შემაშფოთებელი ბაჩო ახალაიას დაკავება კი არა, ის არის, რომ ბატონ გენერალურ მდივანს ყოველივე ამაზე რეაქცია არასდროს ჰქონია. ნატო ყოველთვის ხუჭავდა თვალს საქართველოში ადამიანის ფუნდამეტური უფლებების ტოტალურ დარღვევებსა და დიქტატორული წესრიგის დამყარებაზე.

დღეს, როდესაც საქართველო ახალ პოლიტიკურ რეალობაში აღმოჩნდა, საზოგადოებაში გაჩნდა განცდა, რომ ყველა ის პირი, რომელიც წლების მანძილზე ჩადიოდა დანაშაულს ქართველი ხალხის მიმართ, აგებს პასუხს კანონის წინაშე. მიგვაჩნია, რომ ბატონი გენერალური მდივნის მხრიდან გამოთქმული დაუსაბუთებელი კრიტიკა, უფრო წარმოადგენს ყოფილი ხელისუფლების მხარდამჭერ პოზიციას და ლობირების მცდელობას, ვიდრე დემოკრატიული პროცესებისთვის ხელის შეწყობას. ამდენად, მოვუწოდებთ ბატონ ანდრეს ფოგ რასმუსენს, თავი შეიკავოს საქართველოს შიდა საქმეებში ჩარევისგან.

ასევე, გვსურს მივმართოთ საქართველოს ახალ ხელისუფლებას, გამოიჩინონ პრინციპულობა აღნიშულ საკითხში და მიუხედავად ნატოს გენერალური მდივნის პოზიციისა, სისხლის სამართლებრივი დევნა დაიწყონ არა მხოლოდ ბაჩო ახალაიას, არამედ ყველა იმ პირის მიმართ, რომლებიც წლების მანძილზე ეწეოდნენ დანაშაულებრივ საქმიანობას, მათ შორის, ქვეყნის უმაღლესი თანამდებობის პირებად ყოფნის დროს“ - აცხადებენ პარტია „თავისუფალ საქართველო“-ში.


ნატოს გენერალურმა მდივანმა ანდრეს ფოგ რასმუსენმა საქართველოში მიმდინარე მოვლენებთან დაკავშირებით, ორი დღის წინ განცხადება გააკეთა და აღნიშნა, რომ შეშფოთებულია „პოლიტიკური ოპონენტების“ მიმართ ახალი ხელისუფლების დამოკიდებულებით.