საქართველოს პარლამენტის თავმჯდომარე არჩილ თალაკვაძე ნატოს სამეკავშირეო ოფისის
ხელმძღვანელს როზარია პუგლისის და პოლიტიკურ მრჩეველს ელჟბიერა ბეჟიუკს შეხვდა.
მხარეებმა ნატო-საქართველოს შორის არსებული მჭიდრო ურთიერთობები და თანამშრომლობის მზარდი დინამიკა განიხილეს, რომლის შენარჩუნებაც და გაძლიერებაც მნიშვნელოვანია ორივე მხარისთვის.
საქართველოს პარლამენტის თავმჯდომარის განცხადებით, ევროპულ და ევროატლანტიკურ სტრუქტურებში ინტეგრაცია ქართველი ხალხის ნებას და მთავრობის უმთავრეს მიზანს წარმოადგენს.
არჩილ თალაკვაძემ როზარია პუგლისის და ელჟბიერა ბეჟიუკს საპარლამენტო საქმიანობა გააცნო. საუბარი შეეხო ქვეყანაში მიმდინარე დემოკრატიულ რეფორმებსა და ევროატლანტიკური ინტეგრაციის პროცესს.
საქართველოს პარლამენტის თავმჯდომარემ ნატოს სამეკავშირეო ოფისის ხელმძღვანელს ნაყოფიერი თანამშრომლობისთვის მადლობა გადაუხადა. არჩილ თალაკვაძის განცხადებით, საქართველოს პარლამენტისთვის მნიშვნელოვანია ის აქტიური მხარდაჭერა და დახმარება, რომელსაც ნატოს სამეკავშირეო ოფისი საპარლამენტო საქმიანობის მხარდაჭერისთვის ახორციელებს.
მხარეებმა ასევე ისაუბრეს სასამართლო რეფორმაზე და განსაკუთრებული ყურადღება გაამახვილეს საარჩევნო რეფორმის მიმდინარეობის პროცესზე.
აღინიშნა, რომ ქვეყანაში განხორციელებული და მიმდინარე რეფორმები საქართველოს დემოკრატიულ განვითარებას და პროგრესის მდგრადობის შენარჩუნებას უზრუნველყოფს.
