თურქეთში, ქალაქ სტამბოლში საქართველოს გენერალური საკონსულოს ორგანიზებით, საქართველოს ელჩმა გიორგი ჯანჯღავამ და სტამბოლში საქართველოს გენერალურმა კონსულმა, ინგა კიკვაძემ ქართული დიასპორული ორგანიზაციების ხელმძღვანელებთან გაფართოებული შეხვედრა გამართეს.

შეხვედრაზე განხილულ იქნა საქართველო-თურქეთის სტრატეგიული პარტნიორობისა და კეთილმეზობლური ურთიერთობების ძირითადი ასპექტები და ურთიერთთანამშრომლობის პერსპექტივები.

საგარეო საქმეთა სამინისტროს პრესსამსახურის ცნობით, შეხვედრაზე ხაზი გაესვა ქართული დიასპორის როლს ორ ქვეყანას შორის ურთიერთობების შემდგომი გაღრმავების საკითხში. საქართველოს საელჩომ გამოხატა მზაობა აქტიურად ითანამშრომლოს ქართულ დიასპორულ ორგანიზაციებთან და ჩაერთოს ორმხრივი კულტურულ-საგანმანათლებლო პროექტების განხორციელებაში.

ამასთან, შეხვედრაზე მიღწეულ იქნა შეთანხმება, რომ მსგავსი შეხვედრები მიიღებს რეგულარულ ხასიათს, როგორც საელჩოსა და საკონსულოს წარმომადგენლებთან, ასევე საქართველოდან ჩამოსული ოფიციალური დელეგაციების ხელმძღვანელებთან.