საერთაშორისო საფონდო ბირჟაზე „საქართველოს რგინიგზის“ აქციების 25%-ის გატანა გადაიდო. ამის შესახებ საქართელოს პრემიერ-მინისტრმა ნიკა გილაურმა დღეს მთავრობის სხდომაზე განაცხადა.
გილაურის თქმით, ამის მიზეზი, საერთაშორისო ფინანსურ ბაზრებზე სიტუაციის გაუარესებაა, რაც საბერძნეთისა და ესპანეთის პრობლემებით არის გამოწვეული.
გილაურის თქმით, მთავრობა კონსულტაციებს ბანკირებთან და ინვესტორებთან აწარმოებდა. თუმცა, მათ საერთაშორისო ფინანსურ ბაზრებზე შექმნილი მდგომარეობის გამო, რკინიგზის აქციების გატანა არ ურჩიეს.
,,რამდენიმე კვირის წინ, საკმაოდ კარგი სიტუაცია იყო საერთაშორისო საფინანსო ბაზრებზე და გაზისა და ნავთობის კორპორაციამ წარმატებული ევრობონდი გამოუშვა. დღეს კი, მდგომარეობა შეიცვალა“ - აღნიშნა გილაურმა.
მისივე განმარტებით, საქართველოს რკინიგზის აქციების 25%-ის ბირჟებზე გატანის საკითხი მას შემდეგ განიხილება, რაც საერთაშორისო ფინანსურ ბაზრებზე ვითარება გამოსწორდება.
