ანტიდემპინგური კანონპროექტის საჭიროების საკითხები საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე განიხილეს, რომელშიც ეკონომიკისა და მდგრადი განვითარების მინისტრის მოადგილე, გენადი არველაძე მონაწილეობდა.

ეკონომიკის სამინისტროს პრესსამსახურის ცნობით, კომიტეტის სხდომაზე ერთ-ერთი მთავარი მომხსენებელი შპს „რუსთავის ფოლადის“ გენერალური დირექტორი, ნუგზარ კაჩუხაშვილი იყო, რომელმაც მეტალურგიისა და სამშენებლო მასალების წარმოების დარგში არსებულ პრობლემებსა და გამოწვევებზე ისაუბრა. მისი ინფორმაციით, საქართველოში არმატურის წარმოების განვითარებას ხელს უშლის უცხო ქვეყნიდან იმპორტირებული არმატურა, რომელიც ნუგზარ კაჩუხაშვილის შეფასებით, დემპინგურ ფასებში იყიდება. სწორედ დემპინგის შეფასების კრიტერიუმებისა და ანტიდემპინგური ღონისძიებების საჭიროების საკითხი გახდა დეპუტატების, მთავრობის წევრების, ბიზნესის წარმომადგენლებისა და მოწვეული ექსპერტების მსჯელობის მთავარი საგანი, რომელიც საკითხის სირთულიდან გამომდინარე, ყველა მხარის ჩართულობით კვლავ სამუშაო რეჟიმში გაგრძელდება.

როგორც გენადი არველაძემ სხდომის დასრულების შემდეგ ჟურნალისტებს განუცხადა, კანონპროექტი ანტიდემპინგური ღონისძიებების შესახებ თავის დროზე მომზადებულია ეკონომიკის სამინისტროს მიერ და მთავრობას აქვს მზადყოფნა, რომ თუ კონსენსუსი შედგება და უმრავლესობის გადაწყვეტილება იქნება, კანონპროექტი განხილვისთვის საქართველოს პარლამენტში წარდგენილი იყოს.

„კანონპროექტის ინიცირებამდე ჩვენ მზად ვართ, კონსულტაციების რეჟიმში მუშაობა გავაგრძელოთ, როგორც კერძო სექტორთან, ასევე ყველა დაინტერესებულ მხარესთან, რომ პროცესში მაქსიმალური ჩართულობა იყოს და საზოგადოებაში კონსენსუსი არსებობდეს, არის თუ არა რეალურად ეს კანონი საჭირო ქვეყანაში. თუ ასეთი დაკვეთა მოდის საზოგადოებიდან, მზადყოფნას გამოვთქვამთ, საქართველოს პარლამენტში აღნიშნული კანონპროექტის წარდგენა მოვახდინოთ“ - აღნიშნა გენადი არველაძემ.

არველაძის თქმით, დღეს მთავრობა მოკლებულია შესაძლებლობას დაზუსტებით თქვას, ხდება თუ არა დემპინგურ ფასებში რომელიმე იმპორტირებული, ან ადგილობრივად წარმოებული პროდუქტის გაყიდვა, რადგან არ არსებობს შესაბამისი კანონმდებლობა.

„აქვე მინდა ავღნიშნო, რომ 15 ნოემბრიდან ძალაში ახალი რეგულაცია შედის, რომელიც ქვეყანაში უზრუნველყოფს კონტროლს უსაფრთხო პროდუქტის ბაზარზე განთავსების კუთხით. პირველ ეტაპზე, რეგულაცია ოთხი სახის სამშენებლო პროდუქტზე გავრცელდება, ესენია: არმატურა, ცემენტი, პლასტმასის მილები და ელექტროკაბელები. ამ პროდუქციაზე საბაჟო კონტროლი იქნება იმპორტის კუთხით, ხოლო რაც შეეხება ადგილობრივ ბაზარს, აქ მოხდება ზემოთხსენებული ადგილობრივი თუ იმპორტირებული პროდუქტის სახეობების კონტროლი და ზედამხედველობა, რაც გულისხმობს ლაბორატორიულ კვლევებს, ევროსტანდარტებთან შესაბამისობას და ა.შ.“ - განაცხადა არველაძემ.