ახალი ერა დავების გადაწყვეტაში და მასთან დაკავშირებული გამოწვევები და შესაძლებლობები განიხილება საერთაშორისო კონფერენციაზე - „არბიტრაჟის დღეები 2018“, რომელიც დღეს თბილისში გაიხსნა.

კონფერენციის მონაწილეები საერთაშორისო არბიტრაჟში ახლადდამკვიდრებულ მიდგომებზე, თანამედროვე ტექნოლოგიებზე და ციფრულ და ონლაინ არბიტრაჟზე მსჯელობენ. ღონისძიებაში სხვადასხვა ქვეყნის წარმატებული არბიტრები და იურისტები მონაწილეობენ, მათ შორის 40-მდე საერთაშორისო არბიტრაჟის სპეციალისტი და მოსამართლე.

კონფერენციის გახსნაზე საქართველოს იუსტიციის მინისტრმა, თეა წულუკიანმა აღნიშნა, რომ დავების მოგვარების ალტერნატიული მეთოდების, მათ შორის, არბიტრაჟის განვითარება ხელს შეუწყობს საქართველოში საინვესტიციო გარემოს გაუმჯობესებასა და ჩვენი ქვეყნის არბიტრაჟის რეგიონულ ცენტრად ჩამოყალიბებას. კონფერენცია საქართველოს სავაჭრო-სამრეწველო პალატის პრეზიდენტმა, ნინო ჩიქოვანმა გახსნა.

კარლ ჰარცელმა, ევროკავშირის ელჩმა საქართველოში, ბიზნესის განვითარების პროცესში საერთაშორისო არბიტრაჟის მნიშვნელობაზე ისაუბრა.

საქართველოს სავაჭრო-სამრეწველო პალატის პრესსამსახურის ცნობით, კონფერენციის მონაწილეებს, ასევე, უზენაესი სასამართლოს მოსამართლემ ნინო ბაქაქურმა, საქართველოს ბიზნეს-ომბუდსმენმა ირაკლი ლექვინაძემ, საქართველოს არბიტრთა ასოციაციის თავმჯდომარემ, სოფო ტყემალაძემ და ”საპარტნიორო ფონდის“ გენერალურმა დირექტორმა, დავით საგანელიძემ მიმართეს.

არბიტრაჟის დღეები ჩვენს რეგიონში საერთაშორისო არბიტრაჟის ყველაზე დიდი ყოველწლიური ფორუმია, რომელიც ინფორმაციის გაცვლას და მონაწილე ქვეყნებს შორის პარტნიორობას ისახავს მიზნად. ღონისძიების ორგანიზატორია საქართველოს სავაჭრო-სამრეწველო პალატასთან არსებული საერთაშორისო საარბიტრაჟო ცენტრი (GIAC), ხოლო მხარდამჭერები ევროკავშირი (EU) და გაეროს განვითარების პროგრამა (UNDP) ევროკავშირის უფრო ფართო პროგრამის EU4Justice ფარგლებში.

წლევანდელი არბიტრაჟის დღეების პროგრამა სხვადასხვა საგანმანათლებლო და საინფორმაციო ღონისძიებით იყო დატვირთული. მათ შორის, დავების გადაწყვეტის საერთაშორისო ცენტრთან (ICDR) თანამშრომლობით გაიმართა სემინარი ბიზნესის წარმომადგენლებისათვის საარბიტრაჟო შეთანხმებების შემუშავების შესახებ; ხოლო არბიტრაჟის ეთიკაზე სემინარს გაუძღვა არბიტრთა პროფესიული ორგანიზაცია - Chartered Instituted of Arbitrators (CIArb).

არბიტრაჟის დღეების მსვლელობაში საქართველოს საერთაშორისო საარბიტრაჟო ცენტრმა (GIAC) თანამშრომლობის შესახებ შეთანხმებას ვენის საერთაშორისო საარბიტრაჟო ცენტრთან (VIAC) ხელი მოაწერა. შეთანხმების ფარგლებში ერთობლივი ღონისძიებები გაიმართება, არბიტრაჟის რეგიონული პრაქტიკის შესახებ ინფორმაციის გაცვლა განხორციელდება, თანამშრომლობა გაღრმავდება ისეთ საკითხებში, როგორიცაა საარბიტრაჟო წარმოება და დავების ეფექტიანი გადაწყვეტა.