საქართველოს ინოვაციების და ტექნოლოგიების სააგენტო ტექნოპარკში დღეს, 10 ივლისს საინფორმაციო-საკომუნიკაციო ტექნოლოგიების სფეროში ბიზნეს კლასტერის განვითარების სტრატეგიული მიზნების შესახებ ვორკშოპს უმასპინძლებს.
ვორკშოპი იმართება ევროკავშირის თანადაფინანსებით მიმდინარე პროექტის „მცირე და საშუალო მეწარმეობის განვითარება და DCFTA საქართველოში“, რომელსაც GIZ (გერმანიის საერთაშორისო თანამშრომლობის საზოგადოება) ახორციელებს. სწორედ ამ პროექტის ფარგლებში ჩამოყალიბდა საქართველოს საინფორმაციო-საკომუნიკაციო ტექნოლოგიების კლასტერი, რომელიც მიმდინარე კვირაში ოფიციალურად დარეგისტრირდება.
ვორკშოპს საერთაშორისო ექსპერტების გუნდი გაუძღვება, რომლის შემადგენლობაშიც არიან: მარეკ ტიტსი (ბალტიისპირეთის კვლევების ინსტიტუტი), დორის პოლდი (ესტონეთის ICT კლასტერი), რენე ტონისონი და კერტუ ლინგი (ბალტიის ინოვაციების სააგენტო). ვორკშოპის მიზანია უზრუნველყოს კლასტერის განვითარების ინიციატივით შექმნილი შესაძლებლობის გამოყენება, კლასტერის სწორი მიმართულებით წინსვლა და წევრებს შორის შეთანხმებული პრიორიტეტების მიმართულებით განვითარება. უცხოელი კონსულტანტები კლასტერის წევრებს გაუზიარებენ თავიანთ მოსაზრებებს მთელ რიგ სტრატეგიულ და ოპერატიულ საკითხებზე, რაც სფეროში მათ მიერ დაგროვილ გამოცდილებასა და ექსპერტიზას ემყარება. მონაწილეები განიხილავენ კლასტერის ხედვასა და მისიას, მიზნებს 2025 წლამდე და სამოქმედო გეგმას.
საქართველოს საინფორმაციო-საკომუნიკაციო ტექნოლოგიების კლასტერი მიზნად ისახავს სფეროში მოღვაწე კომპანიების, პროფესიონალების, საგანმანათლებლო და კვლევითი ინსტიტუტების წარმომადგენლების გაერთიანებას კლასტერის წევრების კონკურენტუნარიანობის ამაღლებისა და სექტორში არსებულ გამოწვევებთან გამკლავების მიზნით. კლასტერში ამჟამად 11 კომპანია არის გაერთიანებული, რომლებიც ცდილობენ გაზარდონ კლასტერისა და მისი პრიორიტეტების შესახებ ცნობადობა და მოიზიდონ ახალი წევრები.
საქართველოს ინოვაციების და ტექნოლოგიების სააგენტო საინფორმაციო-საკომუნიკაციო ტექნოლოგიების კლასტერის შექმნის ინიციატივის მხარდამჭერია და მჭიდროდ თანამშრომლობს სექტორში მოქმედ კომპანიებთან. შესაბამისად, კლასტერის წევრებისთვისაც სააგენტო ერთ-ერთ მთავარ სამთავრობო პარტნიორს წარმოადგენს საქართველოს საინფორმაციო-საკომუნიკაციო ტექნოლოგიების კლასტერის განვითარების პროცესში.
ევროკავშირის თანადაფინანსებით მიმდინარე პროექტი „მცირე და საშუალო მეწარმეობის განვითარება და DCFTA საქართველოში“ მცირე და საშუალო მეწარმეებს კონკურენტუნარიანობის გაზრდასა და ევროკავშირთან თავისუფალი სავაჭრო სივრცის პირობებში ჩამოყალიბებულ ახალ მარეგულირებელ გარემოსთან ადაპტირებაში ეხმარება. პროექტი „ევროკავშირი ბიზნესისთვის“ ინიციატივის ფარგლებში ხორციელდება. ევროკავშირის ამ ინიციატივის მიზანია დაეხმაროს მცირე და საშუალო მეწარმეებს ისარგებლონ საქართველოსა და ევროკავშირს შორის თავისუფალი სავაჭრო სივრცის შესახებ შეთანხმებით, კერძოდ, ის ხელს უწყობს ბიზნეს გარემოს გაუმჯობესებას, მეწარმეების ცოდნისა და უნარების ამაღლებას და ფინანსებთან ხელმისაწვდომობას. „ევროკავშირი ბიზნესისთვის“ პროგრამის შესახებ დამატებითი ინფორმაცია იხილეთ ვებგვერდზე: www.eu4business.eu.
ვორქშოპი 11:00 საათზედაიწყება.