პირველი ვიცე-პრემიერის, ეკონომიკისა და მდგრადი განვითარების მინისტრის, დიმიტრი ქუმსიშვილის განცხადებით, საქართველოში დაგეგმილი და მიმდინარე საქმიანობა გაზრდის ქვეყნის კონკურენტუნარიანობას და შექმნის დამატებით შესაძლებლობებს შუალედური დერეფნისთვის, რათა ის „ერთი გზა, ერთი სარტყელის ინიციატივის“ ძირითად მარშრუტად იქცეს.
ამის შესახებ პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა საერთაშორისო სავალუტო ფონდისა და ჩინეთის სახალხო ბანკის კონფერენციაზე სიტყვით გამოსვლისას განაცხადა.
„მტკიცედ გვჯერა, რომ საქართველოში დაგეგმილი და მიმდინარე საქმიანობა გაზრდის ქვეყნის კონკურენტუნარიანობას და შექმნის დამატებით შესაძლებლობებს შუალედური დერეფნისთვის, რათა ის იქცეს „ერთი გზა, ერთი სარტყელის ინიციატივის“ ძირითად მარშრუტად“- განაცხადა ქუმსიშვილმა.


მინისტრის განცხადებით, ამავდროულად, სატრანზიტო შესაძლებლობების გაზრდის შედეგად, გაფართოვდება ქვეყნის შიდა ინდუსტრიული და მომსახურების ბაზა ინკლუზიური ეკონომიკური ზრდის უზრუნველსაყოფად.
„ეს შექმნის ახალ შესაძლებლობებს მოსახლეობის ყველა სეგმენტისთვის და თანაბრად გადაანაწილებს კეთილდღეობის დივიდენდებს საზოგადოებაში როგორც ფინანსური, ისე არაფინანსური თვალსაზრისით“, - აღნიშნა დიმიტრი ქუმსიშვილმა.
კონფერენციაზე სიტყვით გამოსვლისას, საქართველოს პირველმა ვიცე-პრემიერმა მონაწილეებს საქართველოს მთავრობის ისეთი მნიშვნელოვანი ინფრასტრუქტურული პროექტები გააცნო, როგორიცაა ანაკლიის ღრმაწყლოვანი პორტის მშენებლობა, საქართველოს რკინიგზის მოდერნიზაცია და ბაქო-თბილისი-ყარსის ახალი სარკინიგზო ხაზი.